Kita sa OBO niabot na og P130 milyones
CEBU, Philippines — Dul-an sa P130 milyones na ang kita sa Cebu City Office of Building Official gikan sa Enero hangtod Nobiyembre 2024. Mao kini ang gipahibalo sa pangu sa OBO nga si architect Florante Catalan atol sa interview sa OBO’s Sayon Ra, Paspas Pa teleradyo pinaagi sa Sugboanon Channel.
Gitug-an ni Catalan nga wala pa makab-ot sa buhatan ang gitinguhang tinuig nga target nga P160 milyones. Niadtong miaging tuig, ang kita sa OBO miabot sa P150.6 milyones.
Apan dako ang iyang pagsalig nga makab-ot ra ang maong target sa dili pa matapos ang tuig tungod kay mas epektibo na ang ilang mga serbisyo, ilabi na nga kadaghanan sa ilang mga transaksyon nakatutok na karon sa online diin mas dali kini kun itandi sa naandan.
Gibana-bana nga nakatala na sab ang buhatan og 18,000 ka mga transaksyon sukad pa pag Enero hangtud sa buwan sa Nobiyembre ning tuiga lang diin 15 hangtud sa 20 ka mga indibidwal ang nakamugna na og transakson matag adlaw.
Matud pa ni Catalan nga ang nag-unang tulo ka income generators sa buhatan mao ang “Applications for Certificate of Annual Inspection” diin P39.2 milyones ang kita. Ang ikaduha mao ang “Applications for Building Permits nga mikita og P24.6 milyones.
Ang ikatulo mao ang “Applications for Certificate of Occupancy” diin P15.1 milyones sab ang kita niini.
Mipasalig si Catalan sa ilang mga kliyente nga mas palamboon pa nila ang ang sistema sa pagdumala sa kalidad nga mga serbisyo. (BANAT NEWS)
- Latest
