Mga hotel sa Cebu City fully booked na
CEBU, Philippines — Nipadayag sa iyang kalipay si Cebu City Mayor Raymond Alvin Garcia nga napuno na og balik ang mga hotel sa siyudad karon nga nagkaduol na ang Sinulog 2025.
Matud ni Garcia nga aduna siya’y nahinabi nga doktor sa usa ka pribadong ospital sa siyudad nga giingong aduna kini mga pasyente nga gikan pa sa laing dapit ug nagpa-schedule kini og appointment nga inig liwas na sa mga kalihokan sa Sinulog tungod kay wala kini kadayonan sa mga duol nga mga hotel sa ospital tungod kay puno na kini.
“I felt so good, wow kanindot gud ana nga balita! So ato pa, the hotels were complaining the longest time ngano on a January dili man taas ang ilang occupancy”, padayag ni Garcia.
Gipanglantawan ni Garcia nga posible og nakaapekto ang kapahigayonan sa Sinulog diin sa nilabay’ng tuig gipahigayon kini diha sa South Road Properties ang maong lugar layo kini sa sentro. Naglaom si Garcia nga ma-fully book ang mga hotel sa siyudad aron nga maka-recover kini human sa nasinati nga pandemiya.
“I am happy nga a lot of these hotel owners are recovering now sa Sinulog 2025. Mayta makabawi-bawi sa prior years nga wala gyud sila makapapuno sa kaugalingong hotel on a January. I am hoping and praying nga it will be successful Sinulog not only for the participants but also for the business owners”, ni Garcia pa.
Hangyuon usab ni Garcia ang Hotel, Resort & Restaurant Association of Cebu, Inc. (HRRAC) nga dili magpasulabi sa ilang mga presyo karon sa panahon sa Sinulog. BDB BANAT NEWS
- Latest
