Garcia mimando nga dili ipagamit sa politika ang mga sakyanan sa gobiyerno
CEBU, Philippines — Walay kalibotan si Cebu City Mayor Raymond Alvin Garcia kabahin sa nasigpatan nga paggamit sa usa ka barangay truck sa Sambag 1 nga adunay official seal sa Dakbayan sa Sugbo nga nagkarga og mga campaign materials sa KUSUG-Panaghiusa coalition niadtong miaging semana sa Barangay Tejero.
Ang maong partido gipangulohan kini ni Garcia ug Atty. Jose “Joey” Daluz III kinsa nag-tandem sa umaabot nga eleksyon sa sunod tuig.
Usa ka hulagway ang mikatap kun diin nasigpatan sab si Konsehal Jerry Guardo ng nagmando sa mga trabahante nga anaa sa truck.
Una nang gihimakak ni Guardo nga nigamit siya og government vehicle alang sa personal nga katuyuan apan nirenta siya og pribadong sakyanan alang sa pagkarga sa mga campaign material. Sa bahin ni Garcia, ihatag na lang niya sa barangay ang pagsuta kun kinsa ang nimando sa paggamit sa maong truck.
Apan wala niya giawhag ang mga anaa sa katungdanan nga mopahimulos sa kahigayunan nga mogamit sa mga sakyanan sa gobiyerno aron gamiton sa personal nga katuyuan alang sa umaabot nga piniliay.
“Barangay vehicles just like city-owned vehicles cannot be used for private purposes, it always must be for a public purpose. There should be a clear delineation whether that vehicle is rented or not,” pulong pa ni Garcia.
Bisan pa man og girentahan man ang truck, nihangyo sab ang mayor sa mga barangay nga dili kini gamiton sa politikal nga katuyuan kay lainon og sabot sa uban.
Alang kang Garcia, dili na sab kinahanglan magpahigayon og imbestigasyon ug mas maayo nga ang barangay na ang mosulbad niini. (CEBU NEWS)
- Latest
