Cebu nagpabiling pinaka-adunahang probinsya

CEBU, Philippines —  Sa ika-10 nga higayon, ang Probinsya sa Sugbo nagpabilin nga pinakaadunahan nga probinsya lukop nasud pag-abot kinatibuk-ang assets niini, base sa tinuig nga financial report sa Commission on Audit (COA) sa tuig 2023.

Ang Probinsya sa Sugbo, adunay kinatibuk-ang assets nga moabot sa P309. 9 billion, nisaka kini kun itandi sa tuig 2022 nga record nga assets nga miabot sa P235.7 billion gikan sa P215. 27 billion sa tuig 2021.

Ang Probinsya sa Rizal nagpabilin sab nga ikaduha sa pinakaadunahan nga lalawigan sa tuig 2023 ug sa tuig 2022. Ang maong probinsya adunay assets nga miabot sa P39.8 billion sa niaging tuig, misaka kini gikan sa P35.6 billion sa tuig 2022.

Ikatulo nga pinakaadunahan nga lalawigan lukop nasud mao ang Probinsya sa Camarines Sur (P33.4 billion); Batangas (P32.5 billion); Davao de Oro (P23.4 billion); Cavite (P22.9 billion); Ilocos Sur P21.95 billion); Bukidnon (P21.6 billion); Negros Occidental (21 billion); ug ang Pampanga nga ika-napulo, pinaagi sa assets niini nga miabot sa P20 billion.

Base sa financial profile sa Probinsya sa Sugbo, sumala sa COA, ang liabilities sa Probinsya sa Sugbo anaa sa P6.4 billion, hinungdan nga ang equity niini ana apud sa P303.4 billion.

Pag-abot sa financial performance, ang revenue sa probinsya sa Sugbo sa tuig 2023, anaa sa P6.7 billion samtang ang expenses niini miabot sa P3.5 billion. (BANAT NEWS)