Garcia nikwestiyon sa pag-isyu og MPSA sa mining company

CEBU, Philippines — Gikwestyon ni Gobernador Gwendolyn Garcia nganong nahatagan og Mineral Production Sharing Agreements (MPSA) ang usa ka kompaniya sa mina bisan og ang gikubkoban sa maong kompaniya nga lugar duol na sa dapit nga adunay mga nagpuyo sa Siyudad sa Naga.

Atol sa tigom tali kang Garcia ug sa opisyales sa Department of Environment and Natural Resources-7gipangulohan ni Executive Director Paquito Melicor, Mines and Geosciences Bureau-7 Director Armando Malicse, Environmental Management Bureau Director Ma. Victoria Abrera, ALQC Quarry Operations Superintendent William Melano, Jr., ug CEMEX Operations Country Head Luis Franco si Garcia nipadangat og kaalarma sa iyang nasayran nga padayon ang pag-quarry sa Apo Land and Quarry Corporation (ALQC) sa dapit duol sa gipuy-an sa mga residente sa Siyudad sa Naga

“I vehemently question the issuance of an MPSA covering areas where there already are settlements”, matud ni Garcia atol sa tigom niadtong Disyembre 2, 2024.

Ang MPSA usa ka kontrata tali sa gobiyerno ug mining operator diin ang gobiyerno mohatag sa kompaniya og pagtugot nga mokubkob o mo mina sa usa ka partikular nga lugar bugti sa bahin sa kita sa produksiyon.

Ubos sa MPSA, ang operators o kompaniya kinahanglan nga mosunod sa environmental ug safety standards nga gilatid sa Philippine Mining Act of 1995.

Base sa taho sa Sugbo News, nasayran sa gobernadora nga ang pagkubkob nga gihimo sa maong kompaniya nilapas na sa area nga gilatid sa MPSA niini.

“I discovered this by accident that they went beyond the boundaries of both MPSA 1 and 2. And now upon closer study, look at these communities. Ang dami ng mga bahay. Are we going to allow another tragedy to happen just because may MPSA sila?”, matud ni Garcia diha sa Sugbo News.

Base sa datos sa Provincial Planning and Development Office, ang MPSA sa ALQC nag-cover o nagsakop sa 329.96 ka ektarya diin ang MPSA nag-cover sa 199.69 ka ektarya samtang ang MPSA 2 nag-cover usab sa 130.27 ka ektarya.

Apan base sa taho sa Capitol Information Office, ang datos nagpakita nga nakapahigayon na og quarry ang kompaniya sa 20.37 ka ektarya nga lapas na sa mga areas nga cover sa MPSA.

Ang Mines and Geosciences Bureau (MGB) nga attached agency sa DENR maoy responsable sa pagpanalipod, pagdumala ug pag-develop sa mga mineral resources sa nasud.

Niadtong Lunes, ang gobernadora niluwat og executive order nga nagmando sa ALQC nga ihunong ang pagkubkob o “earth-moving operations” niini sa mga lugar nga sakop sa MPSA niini, samtang padayon pa ang pagpahigayon og environmental audit, comprehensive area risk assessment, ug pagsuta sa carrying capacity.

Dili gusto ang Kapitolyo nga subling mahitabo ang landslide sa siyudad diin niadtong tuig 2018 sa Barangay Tina-an niabot ngadto sa 77 ka tawo ang nakalas ug ubay-ubay ka mga panimalay ang natabonan sa pagdahili sa yuta diha sa lugar. — /BDB (BANAT NEWS)