P126 milyones nga pundo gihatag sa Kapitolyo sa LGUs

CEBU, Philippines — Nikabat ngadto sa kapin P126 milyones ang kantidad nga gigahin alang sa proyekto sa imprastraktura nga gihatag sa Probinsiya sa Sugbo ngadto sa nagkadaiyang mga lungsod ug siyudad sa Bantayan Island, ikatulong distrito ug sa ika-upat nga distrito atol sa lain-laing caravan of services nga gihimo sa Kapitolyo sa niaging semana.

Niadtong Disyembre 3, 2024 ang pito ka local government units (LGUs) sa ikatulong distrito nakadawat og kinatibuk-ang P54 milyones nga pundo gikan sa Kapitolyo.

Ang pito ka LGUs nga gilangkuban sa Dakbayan sa Toledo, mga lungsod sa Aloguinsan, Pinamungajan, Balamban, Asturias ug Tuburan nakadawat og tag P8 milyones diin P5 milyones niini ang alang sa proyekto sa imprastraktura nga ipatuman sa mayor ug ang P3 milyones alang usab sa buhatan sa bise mayor.

Ang Lungsod sa Barili nakadawat kini og P6 milyones samtang P5 milyones ang alang sa buhatan ni Mayor John John Garcia ug P1 milyon alang sa buhatan ni Bise Mayor Luisito Ponsica nga gamiton sa proyekto sa imprastraktura.

Niadtong Disyembre 4, 2024, ang Bantayan Island nikabat ngadto sa P24 milyones ang gibubo nga pundo sa imprastraktura sa Kapitolyo diin ang mga mayor sa mga lungsod sa Santa Fe, Bantayan ug Madridejos nakadawat og tag P5 milyones nga kantidad sa tseke samtang tag P3 milyones usab sa mga bise mayor sa nahisgotang mga lungsod.

Ang maong mga pundo gamiton lang sa mga opisyal sa mga ipatuman nga imprastraktura niini diin ipaubos sa auditing requirement sa Commission on Audit (COA).

Samtang sa ika-upat nga distrito, ang unom ka LGUs nga gilangkuban sa Medellin, San Remigio, Daanbantayan ug Dakbayan sa Bogo nakadawat og tag P8 milyones.

Ang lungsod sa Tabogon, gawas sa P8 milyones nga pundo alang sa proyekto sa imprastraktura dugang P3.25 milyones usab ang gihatag nga tabang pinansiyal sa Kapitolyo alang sa Sanggi Festival sa lungsod. — /BDB (BANAT NEWS)