DSWD dunay igong pundo sa ayuda panahon sa kalamidad
CEBU, Philippines — Ang Department of Social Welfare and Development (DSWD) Field Office 7 nipasalig sa publiko nga aduna kini igong stocks sa mga Family Food Pack (FFP) ug Non-Food Item (NFI) nga andam ipang-apod-apod kung adunay dagkong mga katalagman.
Matod ni DSWD-7 Regional Director Shalaine Marie S. Lucero, sa tibuok Central Visayas, ang ahensya nakaandam na og 76,751 ka FFP ug 20,203 ka NFIs, standby fund nga P 500,000, lakip usab ang mga raw materials, ready-to-eat nga pagkaon, ug tubig.
Sa maong ihap, 8,913 ka FFPs ug 3,506 NFIs ang gibutang sa Bohol; 20,751 ka FFPs ug 13,382 ka NFIs sa Sugbo: 40,954 ka FFPs ug 1959 NFls Negros Oriental; ug 6,133 ka FPP ug 1,356 ka NFI sa probinsya sa Siquijor.
Nakatipig usab sila og 46,375 ka FFPs nga nagkantidad og PHP 33.4 milyones ug 7,737 ka NFIs nga nagkantidad og P16.8 milyones sa 68 ka local government units (LGUs) sa tibuok rehiyon, ilabina kadtong anaa sa geographically isolated areas o island municipalities.
Ang food ug non-food items sa DSWD naglakip sa family food packs ug family kits, hygiene kits, kitchen kits, sleeping kits, ug modular tents.
Dugang pa, ang ahensya nihatag usab og dugang 205,046 ka food ug non-food items nga nikantidad og PHP 113.8 milyones ngadto sa 203,046 ka pamilya nga apektado sa El Niño, Low Pressure Area (LPA), Southwest Monsoon, Tropical Storm Kristine, ug pagbuto sa Mt. Kanlaon. Sa laing bahin, ang Visayas Disaster Response Center (VDRC) sa Dakbayan sa Mandaue nga nagsilbi nga sentro sa pag-repack ug pagtipig sa mga food ug non-food items, padayon nga naghatag og suporta dili lang sa Kabisay-an kundi sa ubang mga rehiyon usab, nga makita sa bag-o lang nga deployment sa 530,766 ka FFP sa Field Offices V, VI, VII, XIl nga naigo sa bag-uhay lang nga mga kalamidad.
Matod pa ni Lucero nga aron makatubag ang VDRC sa dagkong mga katalagman bisan unsang orasa, kinahanglan nga aduna kini pundo nga labing menos 250,000 ka family food pack.
- Latest
