Cortes pakyas pagtug-an nga adunay dismissal–Estandarte

CEBU, Philippines — Giinsister sa usa ka abogado nga si dismissed Mandaue City mayor Jonas Cortes nakalapas sa balaod dihang pakyas kini sa pagtug-an nga adunay pending dismissal case atol sa iyang pagsang-at sa certificate of candidacy aron magpapili pag-usab. Si Atty. Ervin Estandarte, residente sa Barangay Pagsabungan, Dakbayan sa Mandaue nitataw nga bisan og ang kamandoan sa Ombudsman nga nag-dismiss kang Cortes sa public service giapelar pa apan angayan kini nga isuwat sa opisyal sa iyahang COC ug dili N/A (Not Applicable).

Matud ni Estandarte nga si Cortes nakahimo og material representation ug nakalapas sa Section 78 sa Omnibus Election Code human kini napakyas sa pag-disclose sa dismissal case.

Ug ang pakyas nga pagbutyag ni Cortes sa dismissal case maoy nagtukmod niya nga mosang-at og petition ngadto sa Commission on Election aron i-disqualify kini sa eleksiyon sa sunod tuig.

Ang Ombudsman nipagawas og dismissal order batok kang Cortes human nakita nga guilty kini sa grave misconduct tungod kay gitugotan niini ang batching plant nga mag-operate sa siyudad nga walay permits. Nitubag si Estandarte sa pamahayag ni Mandaue City Administrator Jamaal Calipayan kinsa nagkanayon nga wala namakak si Cortes dihang gibutang niya ang N/A sa COC.

Matud ni Calipayan nga dili na kinahanglan ni Cortes nga i-disclose ang dismissal case tungod kay under appeal kini ug dili pa final ug executory.

Samtang si Estandarte nagkanayon nga importante ang pagbutyag sa pending cases sa mga kandidato.

Ug kon gi-disclose pa sa kanhi mayor ang iyang dismissal case makanselar sa Comelec ang COC niini.

Gipasabot ni Estandarte nga nasayod nang daan si Cortes sa iyahang dismissal order diin nigawas kini usa ka adlaw sa wala pa siya nisang-at og COC.

“The only reasons that he can cite why he answered N/A is he was insane or he answered it at gunpoint. Or he can say that he answered it in good faith but we all know that ignorance of the law excuses no one”, ni Estandarte pa.

Gitumbok ni Estandarte ang ruling sa Supreme Court nga Tagolino vs. House of Representatives Electoral Tribunal case nga nidesisyon nga “information provided by a candidate in his COC cannot be taken lightly. Should a candidate make false statements of a material representation in the COC, his COC may be cancelled or denied due course”.

Samtang si Calipayan nihulagway nga adunay bulok politika ang lakang nga ipa -disqualify si Cortes apan gihimakak kini ni Estandarte. BDB BANAT NEWS