Magpaburot sa presyo sa mga palaliton sa merkado silotan

CEBU, Philippines — Pahamtangan og silot ang magpausbaw sa presyo sa mga palaliton sa kamerkaduhan sa Dakbayan sa Sugbo ilabi na karong panahon sa Pasko.

Matud pa sa report sa Cebu City Public Information Office, si Acting City Market Administrator Irenea Geneston sa Office of the City Markets nagkanayon nga nagmonitor sila sa nagkadaiyang merkado sa siyudad ug gipahimangnuan na nila ang mga manindahay kabahin sa ilang istrikto nga pagdakop ugaling masakpan nga nagpaburot sa ilang mga presyo.

“Dakop gyud ta nila. Ato gyud na silang ipatawag para mo-explain nganong nagpataas sila sa ilang mga presyo. So, ato na silang himuan og report atong ipadala ngadto sa atoang City Legal Office for show cause (order),” suma pa ni Geneston.

Si Geneston miingon nga ang mga rehistradong manindahay nga makalapas sa ikatulong higayon mamahimong bakwian sa ilang mga pwesto.

Sa pagkakaron, sa inadlaw-adlaw nga mga pagbantay sa Office of the City Markets sa mga presyo sa merkado, wala pa kini nadakpan nga nakalapas sa maong balaod.

Gawas sa pagbantay sa presyo sa mga palaliton, nagpahigayon sab sila og mga kinalit nga pag-inspeksyon sa mga timbangan sa merkado.

Mipahimangno si Genesto sa mga Sugbuanon nga mag-inampingon sa pagpamalit sa merkado ug kun aduna may mahitabo nga pagpangilad, abli ug andam ra ang ilang buhatan nga motubag sa ilang mga reklamo.  MEL BANAT NEWS