Ika-108 nga adlaw’ng natawhan ni Osmeña gisaulog

CEBU, Philippines — Gihandum sa kagamhanan sa Dakbayan sa Sugbo ang ika-108 nga adlaw’ng natawhan ni Sergio “Serging” Osmeña, Jr. kinsa usa ka visionary leader nga maoy niumol sa kasaysayan sa Sugbo.

Ang iyang monyumento nga anaa nahimutang sa Plaza Sugbo gihalaran og mga buwak sa kagamhanan sa siyudad nga gipangulohan ni Bise Mayor Donaldo Hontiveros kauban ang sakop sa Armed Forces of the Philippines ug sa banay Osmeña nga gipangulohan ni Mimo Osmeña kagahapon, Disyembre 4, 2024.

Giila si Sergio “Serging” Osmeña, Jr. isip usa ka mahinungdanong tawo sa kasaysayan sa politika sa Sugbo kinsa nahimo kining gobernador sa Probinsiya sa Sugbo niadtong 1951 ug nahimo usab siya nga mayor sa Siyudad sa Sugbo sa tulo ka termino niadtong 1955, 1959, ug 1963.

Napili si Osmeña nga kongresista sa ikaduhang distrito niadtong 1958 ug isip usa ka fiscalizer mao kini naghatag og pag-ila kaniya sa Congressional Press Club aron nga mahimong kabahin sa Ten Most Outstanding Congressmen niadtong 1959.

Si Osmeña nahimo usab nga senador niadtong 1965 ug ang iyang malungtarong kontribusyon sama sa urban landscape, ug ang landmark nga Osmeña Boulevard ug uban pa nagpabiling garbo sa mga Sugbuanon ang dakbayan ug nasud.

Mapasalamaton si Mimo nga wala kalimti sa kagamhanan ang paghandum sa iyang apohan nga bisan pa man og mitaliwan na aduna gihapon kini gibilin nga dakong kasaysayan nga padayon nga gitagamgam karon sa mga Sugboanon. (BANAT NEWS)