Cebu adunay labing daghang centenarian–DSWD

CEBU, Philippines — Sugod sa pagpatuman niadtong 2016 hangtud sa 2024 nikabat sa 1,009 ka centenarians sa Central Visayas ang giila ug gihatagan og P100,000 cash gift matag usa sa Department of Social Welfare and Development-7 ubos sa Akta Republika 10868 kun “Centenarian Act”.

Base sa datos sa DSWD-7, sa tibuok centenarians, 77 porsyento o 778 niini ang  babaye samtang 23 porsyento o 231 ang lalaki.

Sa maong gidaghanon, ang Cebu maoy adunay labing daghang centenarians nga adunay kinatibuk-ang ihap nga 474 diin 96 niini lalaki ug 378 babaye, gisundan sa Bohol nga adunay 282  diin 73 niini lalaki ug 209 ang babaye, Negros Oriental nga adunay 217 diin 58 ang lalaki ug 159 ang babaye ug Siquijor nga adunay 36 ka gidaghanon , upat niini ang lalaki ug 32 ang babaye. Sa Cebu, ang mga dakbayan nga adunay pinakadaghang centenarians nga nabayran mao ang Cebu City nga adunay 91 ka centenarians, Carcar City, 18 ka centenarians, Mandaue City, 15 ka centenarians, samtang ang mga lugar sa Negros Oriental nga gilangkuban sa Bayawan adunay 19 ug Dumaguete adunay 27 samtang sa Tagbilaran sa Probinsiya sa Bohol adunay19.

Matud sa DSWD-7, lakip sa kasagarang hinungdan sa ilang taas nga kinabuhi mao ang personal nga mga gawi sama sa good eating habits, himsog nga estilo sa kinabuhi, mithi, lawom nga pagtuo sa Diyos, paglakaw, igong oras sa pagkatulog, ug positibo nga disposisyon.