Magtiayon natabunan

CEBU, Philippines — Siyam ka oras nga gikubkob sa mga sakop sa Bureau of Fire Protection Special Rescue Operation ug Cebu City Disaster Risk Reduction and Management Office ang magtiayong natabunan og yuta human nahugno ang riprap sa usa ka condominium padung sa ilang gipuy-an sa Sitio Calma, Barangay Tisa, siyudad sa Sugbo niadtong Domingo sa gabii, Disyembre 1, 2024.

Ang mga natabunan mao ang magtiayon nga sila si Elisa Arangis Batin, 49 anyos ug Liberato Nonoy Batin, 49 anyos.  Nakalas si Elisa tungod sa kadaot nga naangkon pagkadat-og kanila.

Ang Bureau Fire Protection Special Rescue Operation daling niresponde sa lugar diin ang balay nga ginama sa light materials  natubanan sa nahugnong riprap sa usa ka condominium diha sa duol.

Alas-12 sa tungang gabii naugkat si Liberato nga nabaliag tiil ug gidala dayon sa Cebu City Medical Center. Ang iyang asawa alas 2:15 sa kaadlawon na kini nakita ug giingong na cardiac arrest na kini. Alas 2:25 na kini nakuha ug gidala sa CCMC apan gideklarar kining dead-on-arrival.

Sa imbestigasyon sa Labangon Police Station 10 Cebu City Police Office natumba ang riprap atol sa pagbunok sa uwan padung sa balay sa magtiayon. Ang duha naa sa kusina nagluto samtang ang ilang duha ka anak nga babaye nga nag-edad og 12 ug 9-anyos naa sa sala kauban ang tulo ka kabanay.

Nitabang dayon ang mga silingan apan galisod sila gumikan kay bug-at ang mga bato ug semento maong nangayo silag tabang sa barangay.

Si Mayor Raymond Alvin Garcia mimandu sa Office of the Building Official nga mohimo og imbestigasyon ug kinahanglang manubag ang kinahanglan nga manubag.

Gimandoan sab sa mayor ang Department of Social Welfare and Services pagtabang sa mga biktima.

Ang Cebu City Disaster Risk Reduction and Management Office nga gipangulohan ni retired Fire Chief Supt. Anderson Comar miingon nga nakatala ug 17 ka mga insidente  sa 15 ka mga barangay atol sa pagbunok sa ulan nga naglangkob sa landslides-2;  flooding-9; laing nga namonitor nga unom sama sa post fire, electrical fire ug uban pa niadtong Disyembre 1. (BANAT NEWS)