Kita sa GIMARA tungaon sa duha ka LGU

CEBU, Philippines — Gipaabot nga magtunga ang lokal nga kagamhanan sa lungsod sa Ginatilan ug sa Malabuyoc sa kita sa bag-ong tourism attraction sa duha ka LGUs.

Kini kabahin sa memorandum of agreement (MOA) nga gipirmahan ni Gobernador Gwendolyn Garcia sa bahin sa Probinsya sa Sugbo ug nila ni Ginatilan mayor Roy Vincent P. Singco ug Malabuyoc mayor Erlinda Q. Piedad alang sa hiniusang operasyon sa bag-ong gibuksan nga Ginatilan-Malabuyoc River Adventure (GIMARA).

Ang GIMARA nga gilusad niadtong Nobiyembre 30, nag-feature sa Looc River ug Kabutangan Falls.

Ang maong kasabotan, nagtinguha alang sa pagpreserbar sa natural nga atraksyon samtang nagpromote sa responsableng turismo ug paghatag og panginabuhian sa mga lokal nga komunidad.

Ang MOA nilatid sa strikto nga guidelines sa operasyon sa maong river adventure gikan sa trekking ug ubang kalihokan.

Ubos sa maong kasabotan, ang tanang tour guides, operators ug patigayon may kalabotan sa maong tourism activity nga makakuha og accreditation gikan sa Probinsya sa Sugbo ug sa Department of Tourism (DOT).

Sumala sa Capitol Information Office “50-50” ang bahin sa kita sa duha ka munisipyo.

Ang Kapitolyo mopatuman sab og online booking system alang sa maong tourism activity.

Sobra gatus ka mga tour guides nga na train na ug aduna nay sertipiko gikan sa DOT ang narehistro na sa Sugbo Segurado insurance system sa Kapitolyo, diin sila makabenipisyo sa insurance kon ugaling adunay insidente nga mahitabo samtang nagtrabaho

Samtang alang sa mga gustong mosuway sa maong adventure, moabot sa P1, 250 ang bayad alang niini gikan sa trekking, river jumping lakip na ang higayon nga malantaw ang Looc River ug ang Kabutongan Fall cave system nga anaa nahimutang tunga sa lungsod sa Ginatilan ug sa Malabuyoc. (BANAT NEWS)