Kabalayan sa baybayon naugdaw

CEBU, Philippines — Naugdaw ang 60 ka panimalay human niulbo ang sunog sa Base Compound sa Barangay Cansojong, Dakbayan sa Talisay kagahapon sa buntag, Nobiyembre 29,2024.

Nadawat ang alarma sa sunog alas 10:34 sa buntag ug giisa dayon ngadto sa first alarm sa kabumberohan  paglabay sa upat ka minutos tungod kay ang lugar duol sa dagat, kusog ang hangin ug ang kabalayan kasagaran ginama sa gaay nga mga materyales ug hagip-ot ang agianan padung sa lugar.

Tungod niini, mga gagmay lang nga fire trucks maoy makasulod sa lugar gumikan kagamay sa karsada.

Ang mga dagkong firetrucks kutob lang sa dakong dalan ug maoy gikuhaan og tubig sa mga gagmay nga firetrucks.

Matud pa ni FO2 Mar Dee Auxtero, imbestigador sa Talisay City Fire Station nga giisa nila sa second alarm sa sunog tungod kay paspas kaayong mikatap ang kalayo sa mga kabalayan tungod sa kakusog sa hangin.

Ang kalayo miabot gyud ngadto sa mga kabalayan sa baybayon. Ang ubang mga residente naglisod sa pagpalayo tungod kay ang compound nalibotan og kongkretog paril mao nga ang uban  sa dagat na niagi aron makatapon sa pikas.

Ang mga bombero sab ug ubang mga molupyo nigamit og balde aron pagkawos og tubig sa dagat nga gibubo sa sunog.

Usa ka binuhing baboy ang gipaambak sa dagat aron lang maluwas.

Alas 11:11 pa nadeklarar nga kontrolado ang sunog ug na fire out kini alas 11:29. Gibana-bana nga moabot sa P337 mil ang danyos niini samtang walay natala nga nakalas o naangol sa hitabo.

Padayon ang imbestigasyon sa kabumberohan sa sinugdanan sa sunog. IBM BANAT NEWS