Ayuda dili angay gamiton sa politika

CEBU, Philippines — Gitataw ni Gubernatorial aspirant Pamela Baricuatro nga samtang si Gobernador Gwen Garcia naghisgot batok sa mendikasyon, ironic kini kay ang Sugbo nagpadayon sa usa ka “ayuda era” ug ang mga programa niini nagkulang sa pag-atubang sa mas lawom nga mga isyu sa pagsalig sa hinabang sa gobyerno.

Pinaagi sa Facebook post, Si Baricuatro niingon nga ang “Sugbo Kahanas”, nga programa sa Kapitolyo nga naghatag og libreng skills training sa mga nawad-an og trabaho ug panginabuhian, usa ka maayong proyekto nga angay unta nga hatagan og dakong pagtagad ug i-institusyonal sa dugay na nga panahon aron ipakita ang Cebu isip usa ka dato ug progresibong lugar.

Apan matud niya ang Sugbo nagpadayon sa usa ka “ayuda era” ug daghang mga munisipyo ang naglihok sulod sa usa ka "ayuda economy," diin ang pinansyal nga tabang kanunay gamiton isip kapuli sa malungtarong panginabuhian.

Matud pa niya, kini nga pagsalig sa ayuda mahimong mosangpot sa mas seryoso nga mga problema, imbes nga mahimong self-reliant, ug gani gipahimuslan kini aron maseguro ang loyalidad sa mga konstituwente, nga nagmugna og sistema sa "coerced allegiance" sa mga mayor ug sa Kapitolyo.

Si Baricuatro nag-ingon nga ang paggamit sa ayuda isip usa ka politikanhong kahimanan makapawala sa orihinal nga katuyoan niini ug misangpot sa pagsalig imbes sa paghatag og gahum.

Nunot niini, iyang gisugyot nga imbes nga palapdan lang ang mga programa, mas epektibo alang sa administrasyon ang pagkupot sa mga ahensya nga tulubagon sa ilang mga giya, pagsiguro nga ang ayuda nagsilbi sa katuyoan niini isip usa ka programa sa gobyerno ug dili mapahimuslan alang sa politikanhong interes.

"We must prioritize genuine economic development and community empowerment over temporary solutions that perpetuate dependency," segun pa ni Baricuatro. (BANAT NEWS)