Barangay Busay gibutangan og Vehicular Accident Toll Board

CEBU, Philippines — Aron magmatngon ang mga motorista ug dili magkiat sa pagmaneho usa ka Vehicular Accident Toll Board ang gibutang diha sa Sitio Maaslom, Barangay Busay, Siyudad sa Sugbo kagahapon sa buntag.

Nakabutang sa maong Vehicular Accident Toll Board kon pila kabuok ang naangol ug namatay gumikan sa mga nahitabong disgrasya diha sa lugar.

Base sa datos sa Barangay Busay gikan sa buwan sa Enero hangtud sa Nobiyembre 2024 nakatala sila og 178 ka disgrasya diin duha ang patay ug 152 ang angol.

Ang pagbutang og Vehicular Accident Toll Board sa lugar gihimo pinaagi sa koordinasyon sa Land Transportation Office-7, Highway Patrol Group-7, Police Regional Office-7, P5 iDrive Driving School ug PNPA Class 2007.

Nanghinaot si Busay Barangay Captain Yody Sanchez nga pinaagi niini momenor ang mga motorista nga moagi sa dapit.

Giangkon ni Sanchez nga kuwang ang kapasidad sa barangay sa pagluwas sa mga madisgrasya sa dapit tungod kay kuwang sila og ambulansiya. 

"Ako ni butangan tupad og kanang reminder pod nga maghinay sa pagdagan kay guba ang among ambulansiya, to remind them bitaw bisag joke aside masulod sa ilahang huna-huna pirmi", matud ni Sanchez.

Samtang si Cyril Velasco, tag-iya sa P5 iDrive Driving School nitataw nga advocate gyud siya og road safety.

Kini tungod kay mismo siya nabiktima sa gitawag og 'kamote rider' o kining mga magmaneho og motorsiklo nga walay lisensiya ug walay rehistro.

"Dili ko ganahan nga ang uban pod maka-experience ug unsay akong na-experience...(Advocacy) yes, kahibawo naman ta adlaw-adlaw ang atoang aksidente diri pero nahimo nalang normal, mokatawa nalang, gihimo nalang og meme kay para sa tawo wala nay mabuhat pero naa pa tay mabuhat para magamay ang aksidente", ni Velasco pa.

Gihangop sa HPG-7 ang maong inisyatibo tungod kay makatabang kini aron magmatngon ang mga motorista. (BANAT NEWS)