P7.4M shabu nasakmit

CEBU, Philippines — Nadakpan sa mga operatiba sa Regional Police Drug Enforcement Unit(RPDEU)-7 ang usa ka high value individual dihang nihimo sila og buy-bust operation sa Second Street, Happy Valley, Barangay Guadalupe, siyudad sa Sugbo, Lunes sa gabii, Nobiyembre 25, 2024.

Ang nasikop mao si Jason Empleo Bangueran  alyas Aga, 49,residente sa Barangay Green Hills, Lungsod sa San Fernando. Nasakmit gikan sa suspetsado ang 1,100 grams nga shabu nga nagkantidad og P7.4 million.  Sa impormasyon sa RPDEU-7 nga na-monitor nila ang suspetsado nga mag-ulian sa San Fernando apan ang iyahang transaksiyon sa ilegal nga drugas kay naa sa Cebu City.  Tulo ka semana nila nga gipaubos sa monitoring ang suspetsado hantod nga na-taymingan ug nadakpan.

Ubay-ubay ang shabu ang dala sa suspek maong gatuo ang kapulisan nga padung pa kini mag-deliver sa iyang stocks.

Maka dispose matod pa ang suspek og usa ngadto sa duha ka kilo nga shabu kada buwan.  Gisuta sab sa kapulisan kun asa gikan ang mga shabu nga nasakmit sa kapulisan.

Kasong kalapasan sa Section 5 ug 11, Article II sa Republic Act 9165 ang ipasaka batok sa suspek.

Sa pikas bahin, nadakpan sa kapolisan sa Lapu-Lapu City Police Office ang 836 ka mga tawo tungod sa nagkalainlaing kalapasan nga ilang nahimo.Nadakpan sila sa usa ka semana nga Simultaneous Anti Criminality Law Enforcement Operation (SACLEO)  sugod niadtong Nobiyembre 18  hangtod sa Nobiyembre 24, 2024.— Romeo Marantal, Romeo Limpangog (BANAT NEWS)