Kapolisan hugot ang operasyon batok swertres
CEBU, Philippines — Lima ka babaye nga usher sa ilegal nga swertres ug usa ka senior citizen nga coordinator sa sugal ang gipangpaslak sa bilangguan human sa operasyon sa kapolisan sa Probinsya sa Sugbo.
Sa nasayran gihingusgan sa kapolisan ang ilang kampanya batok sa ilegal nga swertres ilabi na ngadto sa kalungsoran.
Ilang nasikop ang usher nga si Josephine Sayson, 53 anyos didto sa Barangay Mantalongon lungsod sa Dalaguete.
Apan nahibaw-an sa kapolisan nga ang coordinator niini naa sa lugar hinungdan nga apil kini sa gidakop.
Nailhan siya nga si Jaime Cartilla, 71 anyos, usa ka biyudo. Sa Dakbayan sa Toledo, nasikop nga usher mao sila si Jennifer Areglado, 36 anyos ug si Maychel Gabotas, 36 anyos sa Barangay Sangi.
Sa lungsod sa Barili, nasikop sila si Maria Chona Alcontin, 34 anyos sa Barangay Japitan ug si Maria Vicenta Guardiano, 52 anyos sa Barangay Guibuangan.
Samtang usa ka Dondon Segovia, 43 anyos sa Barangay Jaguimit siyudad sa Naga ang nasikop.
Ang mga dinakpan gibalhug sa bilangguan samtang magpadayon ang kampanya sa kapolisan sa probinsiya batok sa ilegal nga sugal. (BANAT NEWS)
- Latest
