17 ka asosasyon sa mananagat nitambong sa Fisherfolks Summit

CEBU, Philippines — Gipahigayon sa labing unang higayon ang Fisherfolks Summit sa Dakbayan sa Sugbo diha sa Cebu Business Hotel diin 17 ka asosasyon sa mananagat ang nitambong gikan sa mga barangay sa siyudad.

Lakip niini ang mga barangay sa Ermita ug Inayawan.

Matud sa executive director sa Bantay Dagat Commission nga si Ed Karlon Rama nga tumong sa maong pagpahigayon og Fisherfolks Summit aron mahatagan og kahigayonan ang mga mananagat sa siyudad nga  makapadangat sa ilang mga pangutana ngadto sa mga “regulatory agencies” sa gobiyerno.

Base sa report sa Cebu City Public Information Office nga ang tema sa maong kalihokan mao ang “Pagbuhi Sa Kabaybayonang Panginabuhi Sa Siyudad Sa Sugbo” diin natuki nila ang mga polisiya sa ubos sa administrasyon ni Mayor Raymond Alvin Garcia kalabot sa pagpanagat sa kadagatan diin pipila sa maong mga lagda mao ang kinahanglang magparehistro ang mga mananagat apil na ang ilang mga baroto o pump boat ug mga kahimanan nga gigamit sa pagpanagat kini subay sa City Ordinance 2447.

Atol usab maong panagtigom nagpahigayon og livelihood workshop aron masusi ang matang sa panginabuhian gikan sa produkto sa kadagatan nga mahimong matabang sa city hall ngadto sa mga mananagat. 

Gitambongan kini sa mga ahensiya sa gobiyerno sama sa Bureau of Fisheries and Aquatic Resources, Philippine Coast Guard, Maritime Industry Authority, Department of Veterinary Medicine and Fisheries, Maritime Police, Philippine Navy, ug City Agriculture Office. (BANAT NEWS)