Garcia naglaum nga mas daghan ang mosaksi sa Sinulog 2025

CEBU, Philippines — Giklaro ni Cebu City Mayor Raymond Alvin Garcia nga alang sa social media engagements ang tumong kun nganong nagpa-poll siya sa iyang Facebook page diin nangutana kini sa iyang mga followers kun hain ang mas haum nga pahigayunan sa Sinulog 2025.

“Gusto man gud tag engagements sa atong page kay nagtarget man gud ko og 200,000”, pagkomedya pa sa mayor.

Pero tumong gyud niini mao ang pagpaminaw sa sentiment sa mga Sugbuanon ug malipayon siya nga nagbasa sa mga komento gikan sa mga tawo gumikan kay daghan ang nakauyon nga ibalik na sa Cebu City Sports Center ang pagpahigayon sa Sinulog.

Nakasabot ra sab siya sa mga tawo nga ganahan nga ipabilin sa South Road Properties sama sa aron nga makadani og dugang investors tungod sa dakong luna nga mamahimo gyud nga maka-akomodar og minilyon nga tawo apan mas maayo nga ibalik sa naandan nga venue tungod kay accessible kini sa tanan.

Si Garcia nihimo og command conference sa kapolisan sa siyudad kagahapon ug miingon nga gilauman niya nga mas modoble ang gidaghanon sa mga tawo nga mosaksi sa Sinulog lokal man o langyaw.

Gusto sa mayor og mas istrikto, mas planado ug mas malinawon nga pagpahigayon sa Sinulog aron memorable kini sa tanan.

Subay niini, si CCPO Director Colonel Antonietto Cañete miasoy nga duna na silay mga panagtigom nga gihimo kabahin sa ilang pagpangandam sa Sinulog 2025.

Sa nalambigit nga kalambuan naa na sa 70 porsyento ang pagpangandam sa kaparian nga Agustino alang sa nagsingabot nga 460th Fiesta Se?or.

Atol press conference kagahapon gipakita sa kaparian ang mga gihan-ay nang kalihukan sa nagsingabot nga Fiesta gikan sa pre-fiesta activities nga naglangkob sa pagbisita sa balaan nga bata ngadto sa mga tambalanan, simbahan ug prisohan.

Gipahibalo na usab sa kaparian ang mga rota sa walk with Jesus, walk with Mary ug translation ngadto na sa penitential walk sa besperas.

Si Fr. Jules Van Almerez, ang tigpamaba sa Basilica Minore Del Sto. Niño miingon nga padayon pa sila nga naglihok sa mga papeles alang sa pagamit sa kadalanan lakip usab ang pakig-alayon sa BRT nga mahuman na ang mga rota sa procession o agianan sa dili pa matapos ang tuig apan kung dili gayud ilaha usab kini nga pangitaan og pamaagi. Decemay P. Padilla, Rowena D. Capistrano (BANAT NEWS)