Drug cleared nga mga barangay sa Probinsya gipasidunggan

CEBU, Philippines — Tulo ka mga barangay sa lungsod sa Oslob ug Asturias ang nakadawat og komendasyon o pagdungog gikan sa hunta probinsyal human nalakip sa bag-ong hugna sa mga barangay nga gideklarar nga "drug cleared" nga mga barangay sa Probinsya sa Sugbo.

Sa tulo ka resolusyon nga gipangamahan ni bokal Thadeo Jovito Ouano ug napasar atol sa regular session sa provincial board niadtong Lunes, Nobiyembre 18, gihatagan niini og pasidungog ang barangay Can-ukban sa lungsod sa Oslob ug sa mga barangay Lunas ug Langub nga nahimong "drug cleared" barangays.

Ang Oversight Committee sa barangay drug clearing program maoy mideklarar nga "drug-cleared" ang maong mga barangay human kini nakapasar sa gilatid nga parameters sama sa walay suplay sa ilegal nga drugas; walay kalihokan sa transhipment sa illegal nga drugas, walay drug laboratory ug warehouse; walay chemical warehouse, walay marijuana cultivation site; walay drug den, walay drug pusher, user o indendepent lakip na sa drug financier.

Sa laing bahin gipasiugdahan sa Cebu City Office for Substance Abuse Prevention ang Drug Abuse and Control Prevention Week diha sa Plaza Sugbo diin gihimug-atan ang pagpakigbatok sa ilegal nga drugas ug paghatag og awareness campaign sa syudad aron inanay nga maangkon ang gitinguha nga status isip drug free city.

Si Cebu City Mayor Raymond Alvin Garcia sa iyang mensahe miingon nga ang suliran sa ginadiling drugas dili lang suliran sa gobyerno o sa pamilya sa hingtungdan kundili suliran kini sa tanan, busa angayan nga magtinabangay.

Gipasalig sab ni Garcia nga magpaluyo kanunay sa mga programa sa pagpakigbatok sa ginadiling drugas ingon man gipasidunggan ang pipila ka barangay nga gideklarar nga drug-cleared.

Samtang gisaulog usab sa siyudad sa Mandaue ang Drug Abuse Prevention and Control Week nga gipanguluhan usab ni acting mayor Glenn Bercede.

Kini agi usab og pahinumdum sa katawhan nga likayan ang illegal nga drugas alang sa maayong kaugmaon sa umaabot nga henerasyon.

Gitinguha sa mga opisyales sa dakbayan nga mahimong usa ka drug-free ang ilang komunidad. —Preciosa L. Bacalso, Romeo T. Limpangog (BANAT NEWS)