Garcia nagpaabot pa og daghang kaso

CEBU, Philippines — Wala pa makadawat si Cebu City Mayor Raymond Alvin Garcia sa patong patong nga reklamo nga gipasaka batok kaniya sa mga kanhi empleyado sa City Hall nga giingon nga nahulipan human nasuspenso ug gi-dismissed si mayor Michael Rama.

Ang mga reklamo mao ang grave misconduct, dishonesty, gross neglect in the performance of duty, anti-graft and corruption practices, usurpation of authority ug illegal dismissal nga dili lang si Garcia ang gikasohan apan lakip na sab sila Department of Interior and Local Government-7 Director Leocadio Trovela, City Administrator Atty. Kristine Joyce Batucan, City Legal Officer Atty. Santiago Ortiz, Jr.

Sa press conference kagahapon, miingon si Garcia nga mas sakto ang gibuhat sa tulo ka mga empleyado nga gilugar gyud nila kun asa moduol sa pagklaro sa ilang katungdanan sa kagamhanan diin midangop gyud kini sa buhatan sa Ombudsman ug wala kini milahus pagbalik sa Cebu City Hall.  “If there is a grievance, with the employee, questioning his status, don’t come here and assert that you are an employee. Sakto na ilang gibuhat nga ni-file sila og kaso. Let the courts of law decide on your status as an employee. Rather than come here and bombard the Office of the Mayor and other offices and disrupt the services of the City Hall”, saysay pa ni Garcia.

Dugang pa ni Garcia nga dili makaapektar kaniya ang patong-patong nga kaso, gani, nag-expect pa siya og dugang kasong isang-at batok kaniya karon nga nagkaduol na ang eleksyon.

Matud pa ni Garcia nga dakong kalambuan sab kini human sa nahitabong komosyon sulod sa City Hall sa dihang mibalik si Atty. Collin Rosell tungod kay matud pa nga napupos na ang iyang pagkasuspenso.

Ang mga miduso og reklamo sa Ombudsman mao sila si Mark Lester Ceballos, Glicerio Germudo, Jr. ug Lemuel Felisario samtang laing duha ka tinudlo ni Rama nga sila si Vicente Esmeña ug Teofilo Rosario Jr ang misang-at usab og reklamo batok ni Garcia ug laing tulo ka opisyal.   Gitug-an sa Mayor nga andam siya motubag sa tanang gipasaka nga kaso batok kaniya sa tukma nga panahon. (BANAT NEWS)