Garcia makighinabi sa polis sa pag-abli sa mayor’s office

CEBU, Philippines — Makighinabi si Cebu City Mayor Raymond Alvin Garcia sa kapolisan sa siyudad kong mamahimo na ba nga ablihan pagbalik ang mayor’s office nga gipakandaduhan human sa on-the-spot nga pagkasikop ni Atty. Collin Rosell tungod kay niasumer kini pagbalik isip city administrator tungod kay natapos na ang iyang unom ka buwan nga preventive suspension.

Gikandaduhan ang maong buhatan tungod kay nagpahigayon og imbestigasyon diin gidakop si Rosell.

 Giklaro ni Garcia nga mas maayo mapreserba ang scene of the crime aron mas mapadali ang imbestigasyon sa pagpasaka og kaso batok kang Rosell.

Gani human sa maong insidente gipahugtan ang seguridad sa sulod ug gawas sa city hall sulod sa usa ka semana.

 Apan sa pipila ka adlaw niloag na ang siguridad niini ug nibalik na usab sa normal ang kahimtang sa city hall.

“I think the PNP and including myself, we feel that there is no longer a threat”, ni Garcia pa.

Pasalig ni Garcia nga magpabilin gihapon nga alerto ug magmabinantayon ang Civil Security Unit ug ang kapolisan aron malikayan ang samang insidente nga mahitabo diha sulod sa city hall. (BANAT NEWS)