Super Typhoon Pepito gi-monitor

CEBU, Philippines — Pipila ka mga lungsod sa amihanang bahin sa Probinsya sa Sugbo ang gipaubos sa tropical cyclone wind signal (TCWS) number 1 tungod sa super typhoon Pepito.

Sa alas 5 sa hapon kagahapon nga weather bulletin sa Philippine Atmospheric Geophysical Astronomical Services (PAGASA), apil sa signal number 1 sa Visayas ang tibook Bantayan Island, Medellin ug Daanbantayan.

“Minimal to minor impacts from strong winds are possible within any of the areas under Wind Signal No. 1,” matud sa PAGASA. Ang ubang lugar nga ubos sa signal number 1 ang ubang bahin sa Eastern Samar, ubang bahin sa Samar, Biliran,  northern ug central portion sa Leyte (Tunga, Pastrana, San Miguel, Matag-Ob, Tolosa, Palo, Calubian, Leyte, Mayorga, Julita, Carigara, Babatngon, Dagami, Jaro, San Isidro, Santa Fe, Albuera, Villaba, La Paz, Palompon, Macarthur, Tabontabon, Tanauan, Merida, Ormoc City, Isabel, Dulag, Capoocan, Alangalang, Burauen, Tabango, Tacloban City, Kananga, Barugo, Abuyog, Javier, City of Baybay, Mahaplag), northeastern portion sa Southern Leyte (Silago), ug ang northernmost portion sa Iloilo (Carles).

Sa maong weather bulletin, ang super typhoon Pepito nasigpatan 120 kilometro sa sidlakang bahin sa Virac Catanduanes.  Duna kini hangin nga moabot sa 195 kilometro matag takna duol sa sentro ug paghuros nga 240 kilometro matag takna samtang nag-irog padulong sa west-northwestward. “Strong to typhoon-force winds extends outside up to 300 km from the center,” matud sa PAGASA dungan sa pasidaan nga peligro kini sa tawo ug sa mga kabtangan.

Tungod sa kakusog niini miabot sa signal number 5 ang giisa nga wind signal didto sa Catanduanes ug northeastern portion sa Camarines Sur (Caramoan, Garchitorena, Lagonoy, Presentacion).

Ubay-ubay nga kanselasyon sa biyahe sa mga barko ang gipatuman sa Coast Guard Central Visayas.

Apil sa kanselado ang biyahe sa barko mao ang rota sa Camotes Island padulong sa Leyte;  ug sa Cebu padulong sa mga silingang probinsya.

Sumala sa PCG sa ilang alas- 4 nga abiso, 144 ka mga pasahero ang na stranded kagahapon, 21 ka mga barko, lima ka motorcbanca ug 43 ka rolling cargoes ang wala palargaha. Didto sa lungsod sa Daanbantayan, si Mayor Sun Shimura misuspenso sa tanang kalihokan sa mga eskwelahan sa lungsod.

Giawhag sab sa LGU ang publiko hilabina ang mga mananagat nga likayan ang paglawig sa dagat tungod sa dagkong balod.

Ang Aznar Shipping Corporation, nipahibalo pud nga kanselado ang byahe kagahapong adlawa sa ilang mga barko sa mosunod nga rota; Pingag, Isabel, Leyte padulong sa Danao (vice versa) ug sa Kawit Medellin padulong Santa Fe, Bantayan Island. Si Mayor Benjun Mondigo mipatawag na sab daan og tigom sa mga sakop sa local disaster risk reduction and management niini alang sa pag-andam sa evacuation centers, clearing operations nga himoon ug mga relief goods. Sa lungod sa Bantayan, gimandoan na ni Mayor Arthur Despi ang MDRRO niini nga susihon ang mga kabarangayan. 

Ang super typhoon gi-forecast nga moirog padulong sa west northwestward sa mosunod nga tulo ka adlaw una pa kini nga moliko padulong westward ngadto sa west southwestward karong Nobiyembre 18 (Lunes) sa hapon hangtod sayo sa buntag sa Nobiyembre 21.

Kini mobiya sa Philippine Area of Responsibility (PAR) sa Lunes.  IBM BANAT NEWS