Kapitan sa barko nanghinol

CEBU, Philippines — Wala nakalarga ang usa barko human ang Vietnamese national nga kapitan niini ang gidakop kay gireklamong nanghikap sa pribadong parte sa lawas sa usa ka babayeng customs inspector niadtong Miyerkules sa gabii, Nobiyembre 13, 2024.

Nahitabo kini sa opisina mismo matud pa sa maong kapitan nga naa sa barko.  Nag-edad og 37-anyos, minyo ang suspek samtang 28 anyos ang reklamanteng dalaga.

Sigon ni Police Chief Master Sergeant Elymar Mendoza, imbestigador sa Cebu Maritime Police nga niadto sa ilang opisina ang reklamante ug nagpakitabang nila kay giingong gi-molestiya siya sa suspek.

Dali dayon nga niaksyon ang Cebu Maritime Police uban sa mga sakop sa Philippine Coast Guard tungod kay ang barko naa nakadunggo sa international port ug dili sila basta-basta makasulod.

Uban ang personnel sa CPA niadto sila sa lugar, sa ilang pag-abot naa na sab didto ang customs police.

Nialegar ang biktima nga human makahimo og inspeksyon sa barko giimbitar siya sa kapitan sa opisina niini ug giingong didto gihimo sa suspek ang krimen.

"According sa complainant gibitad siya padung sa cabin, nilugnot siya, maoy iyang narration sa amoa," sigon ni Mendoza.

Nasayran nga ikaduhang higayon na kini nga nag-abot ang biktima ug suspek sanglit sa unang pag-abot sa barko dinhi, ang biktima maoy inspector.

Wala magdahom ang biktima nga buhaton kadto sa kapitan kaniya.

"Siguro gi-assume niya nga nagkagusto niya ang babaye kay second time naman, ang inspector gud kuno gipangutana nako ang victim is ang trabaho niya mosaka gyud siya sa office sa kapitan makig-estorya siya didto kay siya may assign sa pag inspection sa barko before molarga," ni Mendoza pa.

Giingong dunay garas sa kamot ang biktima resulta matud pa sa pugos nga pagbira sa suspek.

Ang suspek matod pa sa iyahang bahin dihang naistorya sa kapulisan mihimakak sa pasangil ug giingong igo ra sila nag-inom og kape.  Ang biktima miingon nga kun moangkon lang ang suspek sa krimen kasong administriba lang ang ipasaka niya apan sa pagkutlo ning maong balita giingong wala gyud niangkon ang suspek hinungdan nga pasakaan sab kini og kasong kriminal.

Ang barko nga nagkarga og metal ug gikatakda untang molarga sa alas-12 sa tungang gabii kagahapon wala kalarga kay gidakop ang ilang kapitan.  IBM BANAT NEWS