Usa ka building sa Lagtang National HS dili pa magamit

CEBU, Philippines — Wa gihapon magamit ang usa ka building sa Lagtang National Highschool sukad nga nasinati ang 5.1 magnitude nga linog niadtong Septiyembre 29 ning tuiga.

Si City Engineer Arnel Bacalso sa Dakbayan sa Talisay nibutyag nga adunay pagpangliki sa building human sa pagtay-og sa yuta ilabi na sa beam sa building.

Gumikan niini si Bacalso nirekomendar nga di lang una kini gamiton samtang dili pa maayo aron siguro nga walay mahitabong aksidente.

Ang mao nga building adunay 12 ka mga lawak saringan diin gigamit sa 400 ka mga bata.

Ang kadagkuan sa eskwelahan nipatuman sa modular distance learning hangtud nga sila nakadesisyon nga puli-pulihon ang mga bata sulod sa duha ka semana aron mag face to face sa klase. Ang Department of Education (DEPED) Talisay City Division nakig-alayon na sa kagamhanan sa Talisay aron sila matabangan sa pagpangita og pundo sa pagpaayo sa edipisyo.

Samtang laing unom ka school building ang nakit-an nga adunay pagpangliki apan wa ra hinuon kini angay nga kabalak-an ug padayon ang klase sa mga tinun-an.  MEL BANAT NEWS