Inflation rate sa Central Visayas Misaka

CEBU, Philippines — Misaka ngadto sa 2.9 porsiyento ang inflation rate sa Central Visayas sa buwan sa Oktubre 2024, tungod sa pagsaka sa presyo sa pagkaon ug transportasyon, sumala sa report sa Philippine Statistics Authority (PSA)-7. Human sa tulo ka sunod-sunod nga buwan nga pagkunhod sa inflation rate, ang Oktubre nitala og 2.9 porsyento nga pagsaka, nga mas taas og 0.8 porsyento sa 2.1 porsyento nga rate niadtong Septiyembre. Hinoon, mas ubos kini kung itandi sa 4.1 porsyento kaniadtong Oktubre 2023.

Ang average inflation gikan sa Enero hangtud Oktubre 2024 anaa sa 3.3 porsyento ug matud ni Archt. Neil Andrew U. Menjares, ang Chief Economic Development Specialist sa National Economic and Development Authority (NEDA)-7 anaa pa kini sa target range sa gobyerno nga 2 porsyento hangtud 4 porsyento.

Matud sa report ni PSA-7 Regional Director Engr. Ariel E. Florendo ang mga nag-unang hinungdan sa pagsaka sa inflation mao ang food ug non-alcoholic beverages nga adunay dakong pagsaka ngadto sa 4.4 porsyento sa Oktubre, gikan sa 2.0 porsyento sa Septiyembre.

Ang mga produkto nga nakatampo sa uptrend niini naglakip sa mga cereal ug cereal products, nga miusbaw sa 9.2 porsyento, mga utanon, tubers, etc. nga -3.0 porsyento, ug isda ug ubang seafoods nga -1.0 porsyento ang usbaw.

Dugang pa, ang ikaduhang dako'g natampo mao ang transportasyon nga nisaka ngadto sa -2.6 porsyento gikan sa -5.7 porsyento niadtong Setiyembre.

Ang bugas ang nag-unang palaliton nga nakatampo sa inflation rate, aduna kini 8.8 porsyento nga pag-usbaw kun itandi sa buwan sa Setiyembre.

Suma ni Florendo nga bisan og ang bag-uhay nga mga bagyo sama sa Bagyong Kristine walay direktang epekto sa Central Visayas, aduna gihapon kini negatibong epekto sa sektor sa agrikultura sama nalang sa pagsaka sa presyo sa bugas.  MEL BANAT NEWS