Dul-an P7 milyong shabu nasakmit sa mga operasyon

CEBU, Philippines — Usa ka high value individual ang nadakpan sa mga operatiba sa Regional Police Drug Enforcement Unit (RPDEU)-7 dihang nihimo sila og buy-bust operation sa Kaohsiung Street, Sitio San Isidro, Barangay Mabolo,  siyudad sa Sugbo.

Ang nadakpan mao si John Bug-ot alyas Insik, 22 ,nagpuyo sa District 7, Barangay Pulpogan, Lungsod sa Consolacion. Nasakmit gikan sa suspetsado ang 1,025 grams nga shabu nga nagkantidad og P6.9 million.

Duha ka semana nga gipanid-an ang suspetsado human makadawat og impormasyon ang kapulisan nga nalambigit kini sa illegal nga drugas ug makabaligya og duha ka kilong shabu kada semana.

Samtang usa ka durugista nga naapil sa regional target list sa mga otoridad ang nasikop atol sa gipahigayon nga buy-bust operation nga gipahigayon sa Purok 8, Barangay Bool, Tagbilaran City niadtong Biyernes sa gabii.

Ang mga operatiba sa PDEA Bohol Provincial Office uban PNP Bohol Maritime Police, Bohol Police Provincial Intelligence Unit, Bohol Police Provincial Drug Enforcement Unit ug Tagbilaran City Police Station maoy nihimo sa operasyon nga gikasikop ni Ronald Taer, 40, taga Barangay Bonbon, Loay Bohol.

Nasakmit gikan niya ang 25 gramong gituohang shabu nga mobalor og P170 mil, buy-bust money ug usa ka cellphone.

Ang tigpamaba sa PDEA-7 Lea Alcantara, nitug-an nga ang dinakpan giingong makadispatsar og 25 gramos nga shabu kada semana.

 Kasong kalapasan sa Section 5 ug 11, Article II sa Republican Act 9165 ang ipasaka batok sa suspek.