Nakuhaan og P1M nga drugas napasakaan na og kaso

CEBU, Philippines — Napasakaan na og kasong kalapasan sa Section 5 ug 11, Article II sa Republic Act 9165 ang usa ka high value individual nga nadakpan sa buy-bust operation sa City Drug Enforcement Unit sa Cebu City Police Office(CCPO) sa Sitio Wang Yu, Barangay Mambaling, siyudad sa Sugbo sa miaging semana.

Ang nadakpan mao si Elmer Gajudo Seniedo alyas Elmer, 37 anyos, residente ra sab sa naasoy nga lugar.

Nasakmitan ang suspetsado og 165 grams gituohang shabu nga nagkantidad og P1.1 million.

Nasayran ang mga operatiba nakadawat og impormasyon labot sa illegal nga kalihukan sa suspetsado hinungdan nga ilaha kining gipaubos sa monitoring.

Human sa monitoring nga gihimo gipahigayon dayon sa kapolisan ang buy-bust operation nga miresulta sa pagkasikop sa suspetsado.

Nagpadayon pa usab ang gihimong imbestigasyon sa kapolisan sa tinubdan sa maong illegal nga drugas. (BANAT NEWS)