190 motorista naisyuhag tiket

CEBU, Philippines —   Moabot 190 ka motorista ang nangadakpan ug naisyuhan og tiket tungod sa mga nahimong traffic violations samtang ubay-ubay nga mga aksidente sa kadalanan ang natala atol sa bisperas hangtud sa pagsugod sa Kalag-Kalag 2024 sa Cebu City.

Base sa report gikan sa Cebu City Transportation Office (CCTO) pinaagi sa Cebu City PIO, 190 traffic citation tickets ang naisyu sa mga traffic enforcers sugod palang Oktubre 31.

Sumala pa ni CCTO head Raquel Arce, ang 60 niini naisyu sa tungatunga palang sa adlaw nianang Nobiyembre 1 o All-Saints’ Day.

Dunay say mga sakyanan nga gi-clamp, samtang dunay mga motor nga gi-impound tungod gihapon sa mga kalapasan sa pagpataka og parking.

Gisakmit sab sa CCTO ang mga lamesa ug mga bangko nga nakaali sa mga dalan.

Sa pikas bahin, dunay dul-an 30 nga natalang aksidente bisperas palang sa All-Saints Day hangtud kagahapon gikan sa nagkalainlaing lugar sa dakbayan.

Naglakip kini sa mga pribadong sakyanan ug mga pasaheroan ingon man mga motorsiklo.

Subling gipahinumdoman sa CCTO ang publiko nga mag-amping kanunay sa pagmaneho ug sundon gyud ang mga lagda sa trapiko aron dili masugamak og disgrasya.

Gawas sa mga sakyanan, sumala pa sa City PIO dunay mga tawong gitiketan ang mga sakop sa CESET ug BEO tungod sa pagpanigarilyo sa publikong lugar ug pataka og labay sa ilang mga basura diha sa sud sa sementeryo. (BANAT NEWS)