Dul-an P1 milyong ga drugas nasakmit sa lungsod sa Sibonga

MANILA, Philippines —  Nasakmit sa mga operatiba sa PNP Drug Enforcement Group-Special Operations Unit(SOU)-7 ang dul-an usa ka milyon ka pesos nga balor sa illegal nga drugas sa buy-bust operation sa S. Carillo, Barangay Poblacion, Lungsod sa Sibonga, kagahapon sa kadlawon.

Nadakpan sa maong operasyon si Roldan Oacan Oamilda, 41 anyos, mananagat ug nagpuyo sa Sitio Bantayan, Barangay Tuyom, Dakbayan sa Carcar.

Nasakmitan ang suspetsado og 135 grams sa gituohang shabu nga nagkantidad og P918, 000.

Nasayran nga taod-taod na nga gi-monitor sa kapolisan ang suspetsado gumikan kay nalambigit kini sa pagpamaligya og illegal nga drugas gawas sa iyang pagka mananagat.

Gikatakda nga pasakaan og tukmang kaso ang suspetsado. (BANAT  NEWS)