Motor natagak sa pangpang

CEBU, Philippines — Patay nang napalgan kilid sa sapa ang 23 anyos nga lalaki nga nahagbong kuyog sa iyang motorsiklo gikan sa pangpang diha sa sitio Santol, Barangay Campo 4, Dakbayan sa Talisay kagahapon sa kaadlawon.

Ang biktima nailhan pinaagi sa nakuha nga lisensya nga si Benjie Acruz, 23 anyos, lumad nga taga lungsod sa Pinamungajan nga nagpuyo sa Barangay Kalunasan, Syudad sa Sugbo.

Sa inisyal nga imbestigasyon nasuta nga gikan pa sa lungsod sa Pinamungajan ang biktima ug mopauli na sa Cebu City.

Si Jonathan Tumulak, pangu sa City of Talisay-Traffic Operation Development Authority (CT-TODA) niingon nga posible nga na slide ang motor niini samtang nagliko sa sementadong dalan sa ibabaw , apan nalahos kini sa pangpang ug natagak sa ubos.

Ang karsada basa tungod sa tubig nga gikan sa ibabaw nga nidagayday sa karsada dayon padung sa maong pangpang ug maoy gidudahang hinungdan sa pagkalamba niini ug natagak sa ubos.

Dunay mga batan-on nga maoy nakakita sa motor diha sa ubos ug dali nila kining gi-report .

Ang mga sakop sa Local Disaster ug Barangay Disaster response teams ang miresponde sa lugar apan wala nay kinabuhi ang lalaki nga naa na sa kilid sa sapa.

Sa mga komento sa netizens bahin sa maong insidente, ilang gibasol ang kakulang sa safety railings sa maong karsada sa ibabaw sa bukid nga kun masipyat ang drayber sa dayong pagliko ug dili makahunong dayon malahos gyud diretso sa maong pangpang.  IBM BANAT NEWS