Probinsiya nagtinguha og direktang flight sa Xiamen City

CEBU, Philippines — Giduso karon sa Probinsiya sa Sugbo ang direktang flight gikan sa Xiamen City sa nasud sa China padulong sa Mactan Cebu International Airport (MCIA) vice versa.

Adunay gihimong diyalogo sa opisyales sa probinsiya pinangulohan ni Gobernador Gwendolyn Garcia uban sa opisyales sa Xiamen Airlines atol sa pagbisita sa mga delegado gikan sa Sugbo didto sa China niadtong Oktubre 31, 2024.

Ang maong tinguha dili lang alang sa turismo nga mabuksan sa mga langyaw nga Chinese national nga direktang makabiyahe sa Sugbo apil na usab sa ekonomiya sa Sugbo.

Nasayran nga sa official business trip sa delegasyon sa Sugbo didto sa China gipaubos sila sa exclusive tour sa Xiamen Airlines headquarters gipangulohan ni Executive Vice President Huang Guohui.

Gidapit usab ni Garcia ang mga business stakeholder ug mga lider sa Zhangzhou City sa Fujian Province nga mobisita sa Sugbo ug mo invest.

Si Garcia nipasigarbo nga ang Probinsiya sa Sugbo maoy numero unong lalawigan sa nasud nga andam modawat og foreign investment alang sa gilaraw nga pagpalambo pa ekonomiya sa Sugbo.

Lakip sa 38 ka delegado nga nikuyog sa maong business trip ang mga bokal nga sila si Glenn Soco, Stanley Caminero, Raymond Calderon, Jiembo Borgonia, Victoria Corominas-Toribio, Kerrie Shimura, Red Duterte, Kuya Nick Pepito, ug Loren Singco.

Samtang sa pribadong sektor apil sa maong grupo ang Mandaue Chamber of Commerce and Industry nga gipangulohan ni Mark Anthony Ynoc; Cebu Chamber of Commerce and Industry, Mactan Cebu International Airport ug ubang tourism ug healthcare stakeholders

Ang grupo motambong kini og mga tigom ug ubang kalihokan uban sa mga Chinese counterpart ug business group.  BDB BANAT NEWS