‘Spiderman’, ‘Son Goku’ nag-sorry

CEBU, Philippines — Gipatawag sa Highway Patrol Group(HPG)-7 ang duh aka mga content creators nga nag-costume og ‘Spiderman’ ug ‘Son Goku’ tungod nag-eksibisyon diha sa Red Cliff sa Transcentral Highway nga gihulagway nga delikado nga makadisgrasya sa ubang mga motorista.

Ang duha ka content creators nga sila Jason Ik ug Boy Banat nag-collab sa paghimo og content sa maong dapit niadtong tungora.

Si Jason Ik, 27 anyos, taga Dakbayan sa Lapu-Lapu ug dunay 980 thousand followers sa Facebook maoy nag costume og Spiderman samtang si Boy Banat, 30 anyos nga lumad nga taga Butuan apan nagpuyo karon sa Lungsod Consolacion maoy Son Goku nga dunay espada ug dunay 1.2 million followers. Sa content, makita nga kun dunay moaging motorista sa Red Cliff mo-eksibisyon dayon ang duha nga nagmustra sama sa mga “powers” sa karakter nga ilang gisuon ug usahay ilaha sab panggukdon.

Gawas niini, nihimo sila og tricyle, ang big bike ni Spiderman gibutangan og sidecar ug maoy gisakyan nila ug nag-banking-banking diha sa maong dapit nga diin daghan na ang naaksidente ug duna nay nakabsan sa kinabuhi kaniadto.

Nag-viral ang maong content apan niani kini og mga negatibong komento sa netizens tungod kay delikado matod pa ilahang gibuhat. Nakaabot sa kadagkuan sa HPG-7 ang maong hitabo hinungdan nga gipatawag sila aron dili na nila usbon ang maong buhat.

Naagian sab mismo sa Regional Chief sa HPG-7 Police Lieutenant Colonel Wilbert Parilla ang gihimo sa duha ug gani nihunong siya ug gitawag sila apan matud pa ni “kamehameha Wave” ra siya ni Son Goku.

"Actually dili gyud na siya bawal as long as dili siya hazardous nga maka create na hinoon og aksidente sa kadalanan just like sa ilang gibuhat nga mosakay sila and ang ilang gisakyan nga tricycle. Ang motor ato is a 650 CC, so bigbike gibutangan lang og sidecar intended for that so kusog kaayo to modagan and then nag curve gud to diha hapit mahulog si Son Goku,"  pagklaro ni Parilla bahin sa video.

Si Spiderman sa iyang bahin mipasabot sa ilahang balay ra niya gihimo ang tricycle kun diin siya maoy driver ug ang komento matud pa sa mga tawo nga dad-on sa TCH kay mao man sab kini ang uso.

Sige sab matod pa og galgal si Son Goku maong gikarga nila ang tricycle sa pick-up ug didto na gi assemble sa TCH. 

Nagtuyok-tuyok sila sa TCH ug sigon niya nga wala siya masayod nga sayop ang ilang gihimo. Apan dihang gipangita sila ug paadtuon sa opisina sa HPG-7 nipatim-aw gyud sila kay nahibawo man sila naa silay sayop nga nabuhat ug gusto sab nila mangayo og pasaylo.

Samtang si Son Goku sa nangayo sab og pasaylo sa mga fans niya ingon man sa mga bashers kay wala sab siya masayod nga gidili ang maong binuhatan sa Red Cliff ug misaad sab siya nga dili na niya kini usbon ug mamahimong responsable sa mga content nga himoon.

Kahinumduman subsob ang operasyon sa HPG-7 sa red cliff aron wala nay mag istambay ug mang banking-banking sa lugar sanglit daghan na ang na disgrasya sa dapit diin ang uban nakabsan gyud sa kinabuhi.

Gipasaylo hinoon sa HPG-7 ang duha kay nakita sab nila nga sinsero kini sa pagpangayo og pasaylo.  Gani tinguha nila nga makig-alayon sa maong mga content creators kay makatabang sila sa pagsabwag sa mga pahimangno sa HPG-7 tungod kay daghan man sila og followers.

Nasayran ang content ni Spiderman kay kinabuhi uban iyahang hinigugma samtang si Boy Banat mga pranks, pakurat ug motabang sab. — IBM  BANAT NEWS