Usa ka HVI ug laing 17 anyos sikop sa illegal nga drugas
CEBU, Philippines — Nag-atubang og kasong kalapasan sa Section 5 ug 11, Article II sa Republic Act 9165 ang usa ka high value individual nga nadakpan sa buy-bust operation sa Labangon Police Station sa Cebu City Police Office sa sitio La Tresas, Barangay Labangon, siyudad sa Sugbo sa miaging adlaw.
Ang dinakpan mao si Lobert Hugo alyas Obet, 28 anyos, nagpuyo sa 48 E, Spolarium Street, Barangay Duljo Fatima ning siyudad.
Nasakmitan ang suspetsado og 105 grams sa gituohang shabu nga nagkantidad og P714,000.
Sa impormasyon sa Labangon Police Station usa ka drug personality ang suspetsado ug nadakpan na sab kini kaniadto sa kasong illegal drugs apan nakagawas human naka probation.
Samtang nadakpan sab sa kapolisan sa Mambaling Police Station ang usa ka 17-anyos nga lalake kay giingong naaktuhan nga namaligya og illegal nga drugas sa sitio Puntod, Alaska, Mambling ning siyudad niadtong Miyerkules.
Ang maong batan-on nagpuyo ra sab sa naasoy nga dapit.
Nasayran nga ang kapolisan nagpahigayon og foot patrolling sa dapit dihang naaktuhan nila ang 17-anyos nga lalake nga namaligya og drugas sa wala mailhing lalake.
Dihang nakabantay ang suspek ug buyer niini giingong nanagan sa managlahi nga direksyon apan nadakpan gyud ang 17-anyos ug nasakmitan og napulo ka gagmay'ng sachet sa shabu. — MEL BANAT NEWS
- Latest
