LTFRB niluwat og 100 ka special permit sa PUBs

CEBU, Philippines — Usa ka gatus ka special permit ang luwatan sa Land Transportation Franchising and Regulatory Board-7 ngadto sa mga PUB.

Niadtong Oktubre 29, 2024 adunay 80 ka PUBs ang nakakuha na og SP alang sa Cebu.

Matud ni Eduardo Montealto, direktor sa LTFRB nga importante ang SP tungod kay magtugot kini sa PUB operations nga mo-extend og gilay-on gikan sa ilang orihinal nga rota o gawas sa ilang rota aron maka pick-up og mga pasahero.

Ang mga PUB nga mobiyahe lapas sa ilang rota nga walay SP makonsidera kini nga kolorum.

Gibutyag ni Montealto nga ang ilang Undas Oplan Biyahe nagsugod niadtong Oktubre 23, 2024 diin hangtud kini sa Nobiyembre 10, 2024 ug sayo usab nag-isyu ang ilang buhatan og SP.

Giawhag ni Montealto ang mga drayber nga kanunay mogamit sa acronym nga BLOWBAGETS.

Ang mga pasahero nga mobiyahe gipahimangnoan usab nga dili mo-patronize sa colorum nga vehicle operations.

Nasayran nga sa 100 ka SP nga ilahang giapod-apod lima niini sa Negros Oriental ug 15 sa Probinsiya sa Bohol.

Nunot niini, gipasalig ni Montealto nga adunay igong mga bus nga mokarga sa mga pasahero nga mopauli sa ilang tagsa-tagsa ka mga lungsod alang sa Kalag-Kalag.  Atol sa ilang tigom tali kang Gobernador Gwendolyn Garcia lakip sa ubang ahensiya nga adunay 587 ka bus sa Cebu South Bus Terminal ug laing 409 sa North Bus Terminal.

Si Rodenita Esgana, hepe sa CSBT ug CNBT nagkanayon nangandam na sila sa mga terminal alang sa pagdagsa sa mga pasahero diin gilaoman nga 20, 000 ngadto sa 25, 000 ang moagi sa CSBT matag adlaw sugod  karong adlawa hangtud ugma samtang 7,000 ngadto sa 9,000 usab ang gilaoman nga nga moadto sa CNBT sa susamang mga adlaw.

Ug aron nga madumala pag-ayo ang pagdagsa sa mga pasahero ang Topline gihangyo sa Kapitolyo nga mo set-up og dugang booths aron maka-deploy og mobile ticketing system.

Sa laing bahin, walo mga sam-ang ang tutokan sa Mandaue City Police Station niining pagsaulog sa adlaw sa mga Santos ug kalag.

Kini ang gibutyag ni Police Lieutenant Colonel Mercy Villaro, tigpamaba sa MCPO nga nahinabi sa Banat News/DyRF1215.

Matud ni Villaro nga 300 ka PNP personnel ang ipakatap walay labot niini ang mga reserve ug standby personnel.

Gibutyag ni Villaro nag-skeletal deploy na sila ug ang full force sa deployment karong adlawa. — Le Phyllis F. Antojado/BDB BANAT NEWS