P84 milyon nga ayuda sa  Estados Unidos

CEBU, Philippines — Nihatag og P84 milyon ($1.5 milyon) ang gobyerno sa Estados Unidos ngadto sa gobyerno sa Pilipinas aron suportahan ang pagresponde niini sa naapektuhan sa bagyong Kristine.

Kini nga pundo makadugang sa padayon nga paningkamot sa US Agency for International Development (USAID) sa paghatod sa mga hinabang alang sa mga nabiktima sa bagyo sa Bicol ug Batangas.

Si U.S. Ambassador MaryKay Carlson nipadayag sa iyang simpatiya alang sa mga naapektuhan sa bagyo ug niingon nga hugot silang nakigtambayayong sa gobyerno sa Pilipinas aron mahatagan og hinabang ang mga komunidad nga nanginahanglan og tabang.

Sukad niadtong Oktubre 25, ang Estados Unidos nakigtambayayong sa mga humanitarian partners sa pag-apod-apod sa mga relief materials sa tibuok nasud, ug uban sa pundo sa USAID, ang World Food Program mipakatap og 33 ka trak aron pagtabang sa Department of Social Welfare and Development (DSWD) sa paghatod sa kapin sa 53,000 ka family food packs ug uban pang mga hinabang sa rehiyon sa Bicol.

Samtang niadtong Oktubre 27, gisuportahan sa USAID ang Office of Civil Defense (OCD) sa Pilipinas sa pagpadala sa 1,500 ka shelter-grade tarpaulin ug 1,500 ka mga household relief kits sa rehiyon sa Bicol pinaagi sa C-130 nga gihatag sa gobyerno sa Singapore.  MEL BANAT NEWS