Mga kawani sa OSCA ‘naglibog’ kinsa ang tumanon

CEBU, Philippines — Naglibog ang mga employado sa Office of the Senior Citizens Affairs (OSCA) human nisulod sa ilang buhatan ang kanhi pangulo nila ug nideklara og status quo.

Human niluwat og perpetual disqualification ang Office of the Ombudsman batok kang Cebu City Mayor Michael Rama 11 sa iyang coterminous nga sakop ang nataktak sa ilang katungdanan human usab nanumpa sa katungdanan isip hingpit nga mayor sa siyudad si kanhi bise mayor Raymond Alvin Garcia.

Lakip kanila ang kanhi OSCA head nga si Homer Cabaral. Si Chito Aragon, bag-ong nainstolar nga OSCA executive director nagkanayon nga si Cabaral nianha sa opisina sa OSCA niadtong Oktubre 23, 2024 sa hapon ug gitigom ni Cabaral ang tanang empleyado sa OSCA ug giingong nakabalda kini sa ilang operasyon.

 Si Aragon kinsa anaa usab niadtong higayona nagkanayon nga si Cabaral nideklara nga siya pa ang pangulo sa OSCA ug nangangkon usab kini nga ilegal ang ilang termination tungod kay ilegal usab ang appointment ni Garcia.

Base sa dokumento nga nakuha ni Aragon gikan sa Human Resource Department Office (HRDO) nasuta nga si Cabaral natangtang sa katungdanan niadtong Oktubre 10, 2024. Si Garcia, atol sa iyang transisyon nipahibawo nga lakip sa kausaban sa iyang pag-asumir mao ang termination sa pipila ka coterminous status.

Samtang, sa laing dokumento nalatid nga ang appointment ni Aragon isip executive director nahitabo niadtong Septiyembre 30, 2024.

Niadtong Oktubre 24, 2024, si Aragon nagkanayon nga nibalik si Cabaral uban kang Jun Rosaroso kinsa kanhi coterminous nga kawani sa city hall ug sa retiradong polis nga si Samson Dasuk nagdala sa samang deklarasyon nga si Cabaral nagpabilin nga pangulo sa OSCA.

“So mao gihapon ang nahitabo gipatawag ang mga tawo, na-disrupt gyud among operations, duha gyud ka higayon, gipatawag gihapon niya ang tanang tawo informing them nga sila tanang papel, tanang dokumento nga siya gihapon ang mo pirma”, matud ni Aragon . “So naglibog atong mga tawo asa I-address ang mga letters, requests, payrolls ug uban pang pirmahanan,” dugang pa niya.

Matud ni Aragon nga gipasabot niya ang mga kawani sa OSCA nga angay nilang ilhon ang iyang appointment tungod kay aduna kini mga dokumento nga gipirmahan ni Garcia.  Si Aragon nagpa-blotter sa polis sa maong insidente ubos sa basehan nga adunay harassment, intimidation, coercion sa mga kawani, ug usurpation ang giingong gihimo ni Cabaral.

Sa iyang habig, si Cabaral nangangkon nga lig-on silang nibarog sa kamatuoran nga wala pa’y finality sa pag-dismiss kang Rama hinungdan nga wala pa mahuman ang iyang termino. Samtang si Garcia nisubli sa probisyon sa coterminous contracts nga ma-terminate kon wala na ang appointing authority sa pwesto. (BANAT NEWS)