Duterte: No apologies, no excuses

CEBU, Philippines — “No apologies, no excuses.”  Mao kini ang gipadayag ni kanhi presidente Rodrigo Duterte kabahin sa iyang war on drugs sa dihang siya pay presidente sa nasud nga diin kaliboang mga drug suspects ang napatay sa anti-drug operations.

Si Duterte namahayag niini atubangan sa mga pamilya sa mga napatay sa maong dugoong kampanya kontra ilegal nga drugas, sa gipatawag nga hearing sa Blue Ribbon Committee sa Senado kagahapon, Oktubre 28,2024.

“Do not question my policies, because I offer no apologies, no excuses. I did what I had to do,” matud pang Duterte.

Mitambong sab sa maong hearing ang mga kaniadto pa dayag nga kritiko sa war on drugs ni Duterte ug sa human right violations nga silang Sen. Risa Hontiveros, human rights lawyer Chel Diokno ug kanhi senador Leila De Lima.

Kauban sa gilingkurang lamesa ni Duterte ang nag-unang kritiko niya nga si De Lima, kinsa dul-an pito ka tuig nga nabilanggo human kini gipasanginlang nalambigit sa ilegal drug trade atol sa termino sa kanhi pangulo.

“I have tried to do the best I can to address the problem of illegal drugs firmly and without compromise. For all of its successes and shortcomings, I, and I alone, take full legal responsibility,” matud pa niya dungan sa pagdepensa sa kapolisan.

“Sa lahat ng mga nagawa ng pulis pursuant to my order, ako ang managot. At ako ang managot, ‘wag ang pulis na sumunod sa order ko,” dugang pa niya.

Mitambong sab sa hearing ang mga kaalyado ni Duterte nga silang Senador Bong Go, Bato Dela Rosa ug Robin Padilla kinsa pulos tanan nidepensa bahin sa drug war sa kanhi pangulo.

Si Hontiveros sa pagsugod sa hearing miingon nga dili lang bahin ni Duterte ang maong hearing kondili apil usab sa mga nabiktima sa pagabusar sa mga otoridad gamit ang drug war.

Gibanabana sa gobiyerno nga moabot 6 mil ang napatay sa maong drug war apan sa talaan sa human rights groups  moabot kini og sobra 30 mil.

Sa pagpadayon sa hearing, si Duterte miangkon sab nga tinuod nga adunay  Davao Death Squad  sa dihang gipangutana siya ni Hontiveros bahin niini, apan gihimakak sa kanhi pangulo nga ang mga miyembro sa DDS mga polis.

Matud niya, ang DDS mga adunahang tawo nga gustong hipuson ang mga kriminal, apan nagdumili siya paghingalan nila kay nakalimot na siya sa ilang mga ngalan.

Giklaro hinuon niya nga walay reward system nga gipatuman sukwahi kini sa gipangbutyag sa iyang sinaligang kanhi general manager sa PCSO nga si Police Colonel Royima Garma ug kanhi CIDG officer ug nahimong Napolcom chief Edilberto Leonardo nga dunay reward nga madawat ang mga polis nga makapatay og drug suspects.

Atol sab sa hearing, si Duterte miangkon nga iyaha gyung giawhag ang mga polis nga mangita og paagi aron makasukol ang mga drug suspects aron duna silay rason aron sila pusilon.

Si Hontiveros miingon nga mao kini ang punto, nga ang pagsige og dasig ni Duterte maoy nagtukmod sa mga polis aron moabusar.

Human sa pamahayag ni Duterte, ang grupo sa mga magbabalaod nga gitawag og “Young Guns” bloc direktang mipadayag nga kinahanglang bilanggoon si Duterte.

Si Rep. Jude Acidre (Tingog Party-list) miingon nga dili immune si Duterte sa legal nga tulobagon ug kini iyang pagangkon, paigo kini aron motuyok ang hustisya sa nasud. “If we truly stand by our principles of justice and the rule of law, then Mr. Duterte must be held accountable. He must go to jail for these EJKs. This is not about politics; it’s about justice,” matud pa niya.

Si House Committee on Human Rights Chairperson Rep. Bienvenido Abante (Manila, 6th District) mipasabot nga kining pagsige og awhag ug mando ni Duterte kaniadto nga patyon ang mga drug suspects  maoy nagtukmod sa mga polis paghimo sa maong mga krimen.

“Well, that would be a normal statement that can be said by any leader, but we've seen his repeated pronouncements to “kill, kill.” He said it numerous times. It emboldened the Philippine National Police officers to actually kill,” matud niya.

Si Duterte giimbitar sab sa Quad Committee sa Ubos Balaybalauranan nga naghimo sab og susamang inquiries may kalabotan sa war on drugs nga diin didto nibutyag ug niangkon ang iyang mga sinaligan nga silang Garma ug Leonardo nangangkon bahin sa “Davao model” nga war on drugs ug reward system.