Duha patay sa aksidente
CEBU, Philippines — Duha ang nangamatay sa nahitabong aksidente sa kadalanan sa Lungsod sa Dalaguete ug sa Dakbayan sa Danao niadtong Domingo, Oktubre 27, 2024.
Sa Lungsod sa Dalaguete, nagbangga ang duha ka motorsiklo sa National Highway, Barangay Consolacion sa maong Lungsod. Ang itom nga motorsiklo gimaneho ni Jerry Padillo Bustamante, , usa ka person with disability ug angkas niya usa ka 16-anyos nga lalake nga Grade 11 student ug ang 14 anyos nga lalake Grade 9 student, ang tulo pulos taga Barangay Balud, Dalaguete samtang ang drayber sa Rusi TC 125 nga motorsiklo mao si Rey Rovena, taga Barangay Tapon sa maong lungsod.
Sa impormasyon sa Dalaguete Police Station ang duha ka motorsiklo gabiyahe sa managlahi nga direksyon. Ang itom nga motor gikan sa south paingon sa north samtang ang Rusi gikan sa north paingon sa south.
Giingong ang duha ka motorsiklo parehong ni-overtake sa ilang mga gisundang sakyanan hinungdan nga nagkabanggaanay.
Gidala sila sa Argao Memorial Hospital apan si Bustamante gideklarar nga dead-on-arrival samtang ang mga angkas niini ug driver sa laing motorsiklo padayon nagpaalim sa tambalanan.
Samtang miresulta sab sa pagkamatay sa usa ka 75-anyos nga babaye dihang kini nabanggaan og Black Taxi diha sa National Road, Barangay Dungguan, Danao City.
Ang nakalas mao si Diosdada Embalzado, 75 years old ug nagpuyo sa Barangay Dungguan sa maong siyudad. Samtang ang driver sa Black Taxi mao si Tommy Berandez, 46, taga Barangay Looc, Lungsod sa San Remegio.
Sa imbestigasyon sa Danao City Police Station milabang ang biktima apan napunggit kini sa maong sakyanan nga padung sa amihanan. Gidala kini sa Cebu Provincial Hospital sa Danao City apan gideklarar kining dead on arrival. (BANAT NEWS)
- Latest
