130 balay naigo sa sunog

CEBU, Philippines — Niabot 130 ka panimalay ang apektado sa sunog nga niulbo sa Sitio Isla Alegre, Barangay Basak San Nicolas ning Dakbayan sa Sugbo kagahapon sa kaadlawon sa adlaw nga Domingo.

Ang sunog naglambigit sa kabalayan sa lugar nga giingong nagsugod sa panimalay ni Erlinda Suerte ug gipuy-an ni Virgilio Suerte.

Ang sunog nadawat sa kabomberohan alas -12:18 ug hingpit nga napawong alas-3:25.

Walay natala nga nakalas o naangol sa maong hitabo apan nagbilin kini og gibana-banang P3 milyones nga danyos.

Sa 130 ka panimalay nga apektado, lima lang niini ang nakan-an sa sunog ang 125 nahurot gyud og kaugdaw.

Dili mominos sa 42 ka mga fire trucks ang nagtinabangay pagpawong sa maong sunog nga anaa sa sudlonong bahin sa maong barangay nga hagip-ot ang agianan padulong sa sulod.

Ang imbestigador sa kabomberohan FO1 Michael John S Nable mosusi pa kun unsay hinungdan sa maong sunog. Usa sa mga residente sa maong dapit nga si Irben Jumao-as nibutyag nga siya ang unang nakasinggit og sunog human nakita niya sa ilang balay nga dunay ni reflect nga hayag ug maoy iyang nakita nga dako na kaayo.

Dugang pa ni Jumao-as, kalit kaayo ang pagdako sa kayo ug dili kini inanay ug wala man usab silay nadungog nga boto.

Gitug-an ni Jumao-as, angayan gayud naay pagpalalom sa imbestigasyon nga himoon ilabi na sa matag higayon nga adunay mag-away sa lugar diin asa nagsugod ang pag-ulbo sa sunog mohisgot gayud kini og naay sunogon.

Gipadayag ni Jumao-as, ang maong dapit diin nagsugod ang sunog katulo na kini diriyot masunog apan matabang lang sa mga estambay.

Mapasalamaton hinoon si Jumao-as nga bisan taliwala ug wala silay nadala atol sa pag-ulbo sa sunog, luwas ra ang mga tawo ug walay nakalas.

Usa ka amahan Ariel Unabia, kinsa lakip sa gatusan nga nasunogan igo nalang sa pagtan-aw sa mga tipaka sa ilang tiilan sa lamisa ug sa paghandum nalang sa ilang kahimtang.

Sumala pa ni Unabia, nasakitan siya nagtan-aw sa nahabilin nalang nga puthaw sa ilang lamesa ug igo nalang sa paghandum nga mao kini ang dapit nga mag-uban siya sa iyang asawa ug mga anak ug magdungan sa pag-ampo dayon ngadto na sa pagpangaon ug pagkukabildo.

Gitug-an ni Unabia, bisan nangabang lang siya sa maong dapit apan nibati na siya og gugma sa ilang gipuy-an ug sakit gihapon para kanila.

Malaumon ang mga nasunogan nga mahatagan sila og ayuda ilabi na kadaghanan kanila ang walay nabitbit tungod sa kakalit sa maong sunog diin kalab-anan sa mga panimalay ginama sa light materials. Ang maong dapit nasunog na niadtong Enero 26, 2015.

Sa talaan sa DSWS dili mominos sa 116 ka mga panimalay, 177 ka pamilya o 685 ka individuals ang apektado sa sunog.

Ang DSWS pinangulohan ni Portia Basmayor nakahatag na og inisyal nga pack meals nga paigo sulod sa tulo ka adlaw.

Ang evacuation center sa mga nasunogan anaa sa Basak Community School diin 12 ka mga lawak saringan ang gipagamit isip kasamtangan nga kapasilongan. —/IBM (BANAT NEWS)