Gipatay kay nagsige og paningil

CEBU, Philippines — Patay ang usa ka 46-anyos nga lalake nga mangulingay human kini gitigbas sa liog sa iyang silingan nga 56-anyos nga lalake nga mangulingay sad diha sa Sitio Avocado, Barangay Macaas, Lungsod sa Catmon, Biyernes sa gabii.

Ang biktima nga si alyas Lito, 46 anyos ug ang suspect nga si alyas Fel, 56 anyos managsilingan ra sa naasoy nga dapit.

Nagkanayon si Police Captain Renerio Mejias, hepe sa Catmon Police Station nga nag-inom ang duha kay bisperas sa fiesta sa ilang lugar.

Dunay bangi daan ang duha tungod gipasanginlan kaniadto sa biktima ang suspek nga maoy nagpatay sa iyang kabayo niadtong buwan sa Septiyembre ug iyaha kining gibayad og P12,000.

Ang suspek nakabayad na og P6,000, katunga sa kantidad sa tumong nga makauli ang ilang maayong relasyon.

Apan samtang nag-inom giingong nagsige og hisgot ang biktima bahin sa namatay niya nga kabayo ug gipaninglan ang suspek sa kuwang niini ug didto na nagsugod nga galalis ang duha.

Ang panaglalis sa duha misangpot sa pagpanigbas sa suspek ngadto sa biktima sa nagkadaiyang parte sa lawas niini nga maoy hinungdan sa iyang kamatayon.

Giandam na sa kapulisan ang pagpasaka og kasong homicide batok sa suspetsado. IBM BANAT NEWS