Garcia: Comelec padayong mopatuman sa mando sa Ombudsman

CEBU, Philippines — Ang Comelec padayon gihapon nga mopatuman sa kamandoan sa Ombudsman batok sa opisyales nga adunay perpetual disqualification ug magpaabot sila sa luwatan nga desisyon sa Korte Suprema human makapadangat sa ilaha unyang tubag matud ni Erwin Garcia, chairman sa Comelec.

Si Garcia nagkanayon nga gihatagan sila og pipila ka adlaw sa Korte Suprema sa pagtubag sa giduso nila nga en banc resolution nga nagdili na gayud sa pagpadagan sa mga kandidato nga aduna nay hukom gikan sa buhatan sa Ombudsman ug gani nakig-alayon na sila karon sa solicitor general nga maoy ilang abogado alang sa pagdepensa sa action ug position nila sa Comelec.

Gibutyag ni Garcia nga base sa ilang initial nga listahan dul-an sa gatus ka opisyal lukop nasud ang adunay perpetual disqualification nga mohupot ug public office.

Matud ni Garcia nga ang maong listahan posible pa kining madugangan human nangayo sila og listahan sa buhatan sa Ombudsman.

Ug kong dili malibkas ang Temporary Restraining Order (TRO) sa Korte Suprema sa mga kandidato nga adunay perpetual disqualification sa dili pa mag-imprinta ang Comelec sa kataposang Domingo sa buwan sa Disyembre 2024 maapil gihapon ang ilang mga pangalan sa balota apan kong unsay sunod nga mahitabo niini dili usa siya mohatag og komento.

Gipadayag ni Garcia nga gibarogan sa Comelec ang respeto ug pag-ila sa gahum sa Ombudsman diin kini nagpasabot nga tanang ahensiya sa kagamhanan angay nga mopatuman sa desisyon sa Ombudsman.

Ang Comelec naglaom nga makita sa Korte Suprema ang logic sa ilang gihimo apan andam sila sa luwatan nga desisyon sa Korte Suprema.

Sayo pa, si suspended Cebu City Mayor Michael Rama ug Mandaue City Mayor Jonas Cortes nakakuha og TRO gikan sa Korte Suprema sa en banc resolution nga gipagawas sa Comelec batok sa mga kandidato nga adunay perpetual disqualification. (BANAT NEWS)