Comelec nipahigayon og public demo sa ACM

CEBU, Philippines — Si George Erwin Garcia, chairman sa Comelec nangulo sa Voters Awareness Campaign ilabi na sa paggamit sa Automated Counting Machine diin gi-target nila ang mga tinun-an sa usa ka state university sa Siyudad sa Sugbo.

Matud sa mga tinun-an sa Cebu Normal University dako kaayo nilang kalipay nga sila ang usa sa mga tunghaan nga napilian sa makasaksi ug makaapil kong unsaon ang paggamit sa automated counting machine.

Ang mga 1st time nga botante nipadayag nga dako kaayo og ikatabang kanila ilabi na bag-o pa sila nga mga botante.

Si Mary Lorene Mancenita, usa usab sa mga tinun-an nibutyag nga pribilihiyo kaayo kanila nga unang makasinati sa pamaagi sa pagamit sa machine. Samtang si Garcia nagkanayon nga ang kamahinungdanon sa pagpanginlabot sa mga batan-on sa gitawag niini nga super election mahitabo na kini sa sunod tuig.

Matud ni Garcia nga sa tuig 2025 matawag kini nga super election tungod kay tulo ka election ang mahitabo nga naglangkub sa midterm election, Bangsamoro election ug sa barangay ug SK elections.

Gipadayag ni Garcia nga sa sunod tuig ang unang higayon nga ipahigayon ang election nga maghatag og kasayon sa mga senior citizen, Person with Disabilities ug mabdos diin makahimo na sila sa pagbotar gikan sa alas 5:00 sa kadlawon ngadto sa alas 7:00 sa buntag ug puros na diha sa ground floor wala nay anaa sa second floor ipahimutang.

Ipahigayon usab ang mga mall voting sa sunod tuig diin kadtong mga barangay nga adunay magpalibot nga mga mall  mahimo silang mobotar didto aron sa paghatag og kahigayonan nga dili na kaayo magpunsisok sa mga tunghaan diin mahimo kining ablihan gihapon sa alas 5:00 ngadto sa alas 7:00 sa buntag alang sa mga seniors citizen, PWD ug mabdos.

Si Garcia nagkanayon nga sila sa Comelec padayon gihapon nga nagpahigayon sa pagpalambo sa ilang mga pamaagi aron dili na masubli ang mga nanglabay nga kakulian.

Gipaniguro usab ni Garcia nga safety ug luwas ang ACM nga ilang gamiton sa umaabot nga eleksiyon diin bisan ug adunay brown-out nga mahitabo dili gihapon kini maapektohan ug daghan usab sila og mga moayo niini sa higayon nga adunay mga kakulian.  (BANAT NEWS)