Missing nga 15-anyos nakaplagan apan patay na

CEBU, Philippines — Patay na nga napalgan ang 15 anyos nga batang lalaki nga gibanlas sa dagkong bawod ug na-missing sukad pa niadtong Miyerkules sa hapon samtang kini naligo sa dagat diha sa Santa Lucia, Malingin, Barangay Punta Engaño sa Siyudad sa Lapu-Lapu.

Si Federico Pedroza nga amahan sa binatilyo maoy miila sa patay'ng lawas niini nga kini ang iyang anak nga si Clinton.

Ang mga sakop City Disaster Risk Reduction and Management Office (DRRMO), CENRO, kapolisan, PNP Maritime Police-7,  Philippine Coast Guard-7, Philippine Navy,  Bureau of Fire Protection-7, mga volunteer divers maoy nagtinabangay pagpangita sa bata gikan pa niadtong Huwebes sa buntag. Si Mayor Junard "Ahong" Chan ang miam-am sa inahan ug sa hinigugma sa biktima nga maoy kauban sa binatilyo dihang nahitabo ang insidente.  Si Chan sa iyang post nagpasalamat sa mga nagtinabangay pagpangita sa bata, apil sa nitabang ug gipasalamatan sa mayor ang usa ka Korean diver nga niboluntaryo sab sa pagpangita. “Akong pahasubo sa gibiling pamilya ug mga kaliwat ni Clinton kay mibiya intawon siya niining kalibutana nga pwerte pa ka bata. Daghan pa unta siyang mga pangandoy sa kinabuhi ug siguro nga daghan pa sad mo’g plano para kaniya,” matud pa sa mayor. (BANAT NEWS)