Nag-bomb joke tinun-an ra

CEBU, Philippines — Nadakpan ug gipasakaan sa National Bureau of Investigation Central Visayas ang usa ka 19 anyos nga tinun-ang babaye sa Cebu Technological University kinsa maoy gikatahong nag-post og bomb joke sa ilang tulonghaan niadtong Oktobre 21, 2024.

Ang nidakop kaniya mao ang NBI Cybercrime Division Manila Lead Agency, NBI - CEVRO ug NBI - CEBDO.

Ang maong tinun-an nga si alyas Thea, taga  Mandaue City napasakaan na og kaso tungod sa kalapasan sa Anti-Bomb Joke/Threat Law ubos Presidential Decree no. 1727 in relation to R A 10175 (Cybercrime Prevention Act of 2012).

Gidakop siya diha mismo sa iyang gipuy-an niadtong Oktobre 22, 2024 sa hapon sa dihang na-trace sa NBI ang iyang post sa Facebook ug numero nga nakarehistro para niini nga account.

Nasuta nga si Thea ug John Steven usa ra ug usa ra ilang rehistradong numero sa cellphone nga gigamit sa FB account ug sa rekord niini sa eskuylahan.

Aron pagsiguro, gitawgan sa NBI ang maong numero dihang naa na sila sa address niini sa Mandaue ug dihang iyang gitubag, positibo nga siya gyud kini.

Matud pa ni Atty. Renan Augustos Oliva, ang Regional Director sa NBI-CEVRO, nga seryuso ilang pagtagad aning mga bomb jokes maong nagpatabang sila sa NBI Cybercrime Division sa Manila nga nipadala dayon og team dinhi.  Una pa kining higayon nga adunay nadakpan ang NBI nga nakalapas sa Anti Bomb Joke law ug napasakaan gyud og kaso.

Malaumon ang NBI nga magsilbi untang leksyon sa tanan nga dili magkomedya og sama niini.

Si Atty. Marvey A. Ocampo, Dean, Student Affairs & Services sa CTU Main Campus miingon nga duna silay himuong linaing imbestigasyon alang sa pagpahamtang og disciplinary action batok sa maong tinun-an subay sa due process.

Si Ocampo miingon nga dili badlungon ang maong tinun-an ug hilumon kini.

Pangusgan sab nila ang information campaign mahitungod sa responsableng paggamit sa social media ug mga school regulations subay sa ilang school handbook.

Kung mahinumduman gisuspenso ang klase sa tibuok CTU niadtong adlaw nga Lunes Oktobre 21, 2024 tungod sa pagkaylap sa social media sa bomb threat nga nagdala sa pangalan John Steve nga nag-ingong adunay bomba nga moboto ug aduna pay hulagway sa matud pa bomba.

Ang maong tinun-an nagdumili sa pagluwat og pamahayag atubangan sa media apan kini nangangkon nga duna ray nagsugo kaniya nga wa sab niya ibutyag kun kinsa.

Si Dr. Sherryl Abellanosa, head psychologist sa USC kauban Psychological Center, nipahinumdum sa mga batan-on nga kinahanglang responsible sila sa ilang pangbuhaton ug hunahunaon una og maayo ang sangputanan niini. (BANAT NEWS)