Nag-shopping og karne ug sinina nga wala mobayad dakpan

CEBU, Philippines — Gidakop ang usa ka 23-anyos nga lalaki human kini nangompra og karne sa usa ka mall diha sa Natalio Bacalso Avenue, F. Llamas Street, Barangay Basak San Nicolas, Siyudad sa Sugbo nga walay bayad niadtong Miyerkules sa udto, Oktubre 23, 2024.

Ang nadakpan mao si alyas “Jhon”, 23, taga Barangay Mantalongon, Lungsod sa Dalaguete.

Base sa taho nga ang suspetsado nikuha og karne sa manok ug baboy nga ang tanan nagkantidad og dul-an sa P8,000 apan wala moagi og cashier.

Giingong sekreto nga gibutang sa suspetsado ang mga karne sa eco bag ug backpack ug deretso nga nigawas sa mall.

Apan nasakpan kini sa gwardiya sa maong mall hinungdan nga gidakop ug gidala diha sa Mambaling Police Station.

Base sa imbestigasyon sa Mambaling Police Station ibaligya sa suspetsado ang mga karne nga iyahang gikuha.

Ang suspetsado gikatakda kining pasakaan og tukmang kaso sa nahimo niining kalapasan.

Sa laing bahin, usa ka babaye ang nasikop usab human kini nanguha og mga sinina nga walay bayad diha usab sa usa ka mall sa Barangay Tabunok, Dakbayan sa Talisay niadtong niaging adlaw.

Ang suspetsado mao si alyas “Apple”, hingkod na ang panuigon nasikop usab kini sa gwardiya sa mall.

Base sa imbestigasyon sa kapolisan nga nagpakaaron-ingnon ang suspetsado nga mamalitay diin nanguha kini og mga sinina nga baligya apan wala miagi sa counter o cashier.

Ang suspetsado gigukod kini sa gwardiya ug gisita ug dihang wala kini napakita nga kamatuoran nga nakabayad na gidakop kini sa gwardiya. BDB BANAT NEWS