Kaso sa Dengue sa siyudad sa sugbo nagkaminus

CEBU, Philippines — Wa na kinahanglana ang deklarasyon nga ipaubos sa “state of public health emergency” ang dakbayan sa Sugbo tungod sa kaso sa dengue, tungod kay pabiling "manageable level" ang status niini karon tungod kay nagsugod na sa pagkunhod ang kaso sa dengue karong buwana.

Kini ang gipasabot ni konsehal Jocelyn Pesquera pinaagi sa interview sa Sugbuanon Channel, “No (need for public health emergency). Very low (ang dengue incidents) ra ato. So ato nang gi monitor in a per barangay basis. Pinakataas nga incident level is just 5 percent. Very manageable ra” suma ni Pesquera.

Isip chairperson sa Committee On Health, Hospital Services and Sanitation, si Pesquera miingon nga kanunay siya nga magdawat og report gikan sa City Health Department (CCHD) mahitungod sa dengue situation sa siyudad diin base sa datus nga iyang nadawat nga mitaas ang kaso sa dengue niadtong buwan sa Agosto ug Septiyembre tungod sa pag-uwan-uwan.

Base sa report sa CCHD niadtong Oktubre 19 anaa na sa 2,995 ang kaso sa dengue sa siyudad.

Gibutyag usab ni Mayor Raymond Alvin Garcia nga niadtong unang semana sa Septiyembre nakatala ang CCHD og pinakataas nga kaso sa dengue diin miabot kini ngadto sa 365 apan nikunhod kini sukad pa niadtong Septiyembre 9.

Mitubag sab si Garcia sa pasangil ni Konsehal Mary Ann delos Santos nga walay igo nga komprehensibong solusyon nga gipatuman ang CCHD aron mokunhod ang kaso sa dengue.

Depensa ni Garcia nga ang pagkunhod sa kaso sa dengue naggumikan sa pagpahigayon og misting, blanket impregnation ug pagpakatap sa kampanya batok dengue ngadto sa nagkadaiyang sitio ug barangay sa siyudad.  MEL BANAT NEWS