DEPW nagpahigayon og declogging

CEBU, Philippines — Nipahigayon kagahapon og declogging operations sa open canal ug drainage system sa Sitio Tabucanal Pardo ang Department of Engineering and Public Works.

Ang maong kalihokan gipangulohan ni Engineer Agustin Caballero sa DEPW.

Matud sa pangulo sa maintenance section sa DEPW Norma Del Mar nga adunay mga sagbot ug debri ang naali sa kanal.

Gibana-bana nga moabot sa lima ngadto sa walo ka adlaw ang pagpangolekta sa basura nga gibana-bana usab nga moabot sa tulo ka trak dekarga.

Gilaoman nga magpadayon ang pagpanangtang sa nag-ali sa drainage nga hinungddan sa pagbaha diha sa dapit.

Ang maong operasyon sa declogging kabahin kini sa flood mitigation initiatives sa siyudad aron sa pagtubag sa problema sa mga dapit nga bahaanan ilabi na panahon sa ting-uwan.

Si Mayor Raymond Alvin Garcia mapasalamaton sa DEPW sa ilang gihimo nga aksyon.

Matud ni Garcia nga importante kaayo ang pagpanglimpiyo sa mga kasapaan ug kanal aron malikay ang komunidad sa mga baha. (BANAT NEWS)