113 ka mag-uuma sa Siquijor nakadawat og fuel subsidy

CEBU, Philippines — Niabot sa 113 ka mag-uuma gikan sa Lungsod sa Maria, Probinsiya sa Siquijor ang nakadawat og fuel subsidy discounts card gikan sa Department of Agriculture-Regional Field Office (DA-RFO)- 7.

Pinaagi sa Provincial Agricultural Technology and Coordinating Office (PATCO) Siquijor, ang matag mag-uuma nakadawat og cash card nga nagkantidad og P3,000 nga ilang magamit sa pagpalit og gasolina sa partisipanteng fuel station.

Si Arvin Tubal, usa sa mga mag-uuma nagpasalamat sa maong fuel subsidy sa DA diin matud niya makatabang kini sa ilang pagpanguma ilabi na nga naggamit sila og tractor diha sa ilang basakan.

Ang DA pinaagi sa Bureau of Agriculture and Fisheries Engineering (BAFE) ug sa DA Regional Field Offices kasamtangang nagpatuman sa Fuel Assistance for Farmers nga gipundohan ubos sa GAA para sa fiscal year 2023 ug 2024.

Sayo pa, giaprobahan sa ahensiya ang pagpagawas og P510.447 milyones nga fuel subsidy karong tuiga alang sa 160,000 ka mag-uuma nga nanag-iya o nag-abang og mga makinarya sa pag-uma ug mga miyembro sa farmers' cooperatives/associations (FCA) nga usab nagnag-iya o nag-operate og makinarya.

Ubos sa proyekto, makadawat og fuel subsidy nga P3,000 ang matag rehistradong mag-uuma sa Registry System for Basic Sectors of Agriculture. (BANAT NEWS)